Keetmanshoop-skou skitter weer

Yochanaan Coetzee – Die Keetmanshoop-skou, ’n hoogtepunt op die Suide se kalender, gaan vanjaar uitblink soos nooit tevore nie.Met ’n nuwe bestuursraad en ’n vars benadering, word uitgesien na wat hulle glo die grootse Keetmanshoop-skou tot nou toe gaan wees.Die voorsitter van die skouraad, mnr. Charles Josob, sê dit is ’n belangrike geleentheid vir die dorp en die gemeenskap om saam te kuier, mekaar se ondernemings te ondersteun en te netwerk sodat nuwe geleenthede vir die gemeenskap geskep kan word.“Ons skou het in die afgelope paar jaar ongelooflik uitgebrei. So, noudat daar ’n nuwe raad is, wil ons daarop voortbou en vir diegene wat dit bywoon, só beïndruk dat hulle weer vir ander sal vertel. Ons wil hê die skou moet homself bemark en aan besoekers ’n onvergeetlike ervaring bied,” het hy gesê tydens ’n besigtigingstoer van die opgeknapte skouterrein in die Westdene-woonbuurt.Die meeste van die gewildste trekpleisters is weer op die program, maar vanjaar se aktiwiteite sluit nog meer vir die jongspan in.“Omdat daar genoeg is vir die ouer garde wil ons nou baie vermaak vir die jongklomp bied, nie net om die kinders besig en tevrede te hou nie, maar om ’n geleentheid te skep waar die hele familie dit ten volle kan geniet.”Benewens ’n groter pretpark met meer pret- en ponieritte asook interessante speletjie-stalletjies, gaan daar ook vanjaar ’n slangpark wees om bewustheid te skep oor hierdie interessante maar veel gevreesde diere.“Ons wil elke jaar kyk watter nuwe aanloklikhede ons kan byvoeg sodat daar elke jaar iets is wat die skou besonders maak,” het mnr. Karl-Heinz Burger, die skouraad se terreinbestuurder, gesê.Die Keetmanshoop-skou word landswyd herken as ’n paradys vir vleisliefhebbers en daar word groot klem gelê op die vaardigheide van die braaiers omdat vleis 'n baie ernstig kwessie in hierdie wêreld is.Verlede jaar is ongeveer 3,5 ton skaapvleis en 500 kg boerewors deur ’n span van Keetmans se beste braaiers en potjiemeesters voorberei – en dit sluit nie eens in wat vir die kapana-kompetisie gebruik is nie. Tog was dit nie genoeg om die Suiderlinge en hul besoekers se vleislus te bevredig nie.Vanjaar gaan hulle seker maak daar is meer as genoeg vleis, vis en pluimvee op die spyskaart. Dié verskeidenheid word aangevul met die meer as 150 stalletjies wat kos en talle ander dienste en produkte aanbied en bemark.“Ons wil soveel as moontlik mense, organisasies en besighede die geleentheid gee om hul besigheid of diens te bemark. Die skou bring ook baie burgerlike dienste nader aan die mense. So, benewens die aangename geleentheid om saam te kuier en jou besigheid te bevorder, gee dit vir baie mense toegang tot inligting en dienste op ’n gemaklike en baie toeganklike manier,” het Josob gesê.Vir landbouers gaan daar beslis ook baie wees om te sien, leer en hopelik koop by die vee- en Swakara-kompetisie en veiling asook die hoenderskou.Daar is iets vir almal en om die feesvieringe af te skop gaan van die Suide se fraaiste jong dames die loopplank aanpak in mededinging om die Mej. Keetmanshoop Skou-kroon, in een van die nuwe spogsale wat onlangs teen ’n koste van N$9 miljoen opgeknap is.“Een van die grootse doele van die skou is om belegging in ons dorp aan te moedig. Dit is hoekom alles wat ons uit die skou maak, weer teruggeploeg word,” het Josob gesê. “Ek moet ook noem dat die skou deur die jaar baie minderbevoorregte mense en organisasies in die dorp ondersteun het.”Die amptelike opening vind op Dinsdag 12 September plaas en word die Saterdag met die “Extravaganza”-aand, ’n jarelange hoogtepunt, afgesluit. Verskeie kunstenaars sal optree en iets vir elke smaak aanbied.“Die skou is vir almal en ons wil elke ouderdom, geslag en kultuur insluit sodat ons saam as ’n dorp en streek ons gemeenskap kan vier, en ons koppe bymekaar kan sit om oor ons se struikelblokke te kom en saam as ’n dorp te ontwikkel,” het Josob afgesluit.Vir navrae kan hy by 081 754 9901 gekontak word.

Keetmanshoop-skou skitter weer

Kommentaar

Republikein 2025-07-01

Meld asseblief aan om kommentaar te lewer

Keetmanshoop-skou skitter weer

Kommentaar

Republikein 2025-07-01

Meld asseblief aan om kommentaar te lewer

MELD AAN

Advertensie