Kaxui Katjivi gevonnis

Jacqueline Louw - Tydens die vonnisoplegging van ’n man wat sy vrou doodge­steek het, het die regter gelas dat ondersoek na die beweerde onbehoorlike optrede van twee polisiebeamptes ingestel behoort te word.
Regter Christi Liebenberg het Vrydag die 34-jarige Kaxui Katjivi, wat die 26-jarige Dina Anton op 31 Julie 2014 met ’n mes doodgesteek het, tot 35 jaar gevangenisstraf gevonnis.
Regter Liebenberg het gelas dat Katjivi 35 jaar gevangenisstraf opgelê word vir moord kragtens die wet op huishoudelike geweld en een jaar gevangenisstraf vir aanranding met die doel om ernstig te beseer. Op ’n derde klag van aanranding is net ’n waar­skuwing aan Katjivi uitgereik.
Verder is gelas dat die tronkstraf gelyktydig uitgedien word. Katjivi sal dus 35 jaar in aanhouding deurbring.
Liebenberg het in sy uitspraak genoem die beweerde optrede van twee polisiebeamptes wat by die Otjinene polisiekantoor aan diens was toe ene me. Bertha Eises, Anton se suster, by die polisie om hulp aangeklop het. Dit was net voor die voorval wat tot die dood van Anton gelei het. Eises wou rapporteer dat Katjivi met ’n mes bewapen was en gedreig het om haar en die oorledene aan te val. Die polisiebeamptes het haar egter weggewys. Die offisier aan diens het haar na bewering meegedeel dat sy skof geëindig het en hy nie meer aan diens was nie terwyl ’n tweede offisier na bewering opgemerk het dat hy “moeg was van daardie twee mense wat rusie maak” en hy het geweier om te help. Eises het na Katjivi se huis teruggekeer waar sy vir Katjivi ingelig het dat die polisie geweier het om op die klag te reageer. Die oorledene is kort daarna doodgesteek.
In sy uitspraak het Liebenberg gesê dat indien die getuienis van Eises in verband met die twee polisielede waar is, hul versuim om op te tree ’n ernstige pligsversuim verteenwoordig. “Die teenwoordigheid van die polisie sou in alle waarskynlikheid die aanval op die oorledene kon verhoed het, aangesien sy van plan was om na Okakarara te vertrek en by haar moeder te gaan woon,” het Liebenberg gesê. Hy het verder gelas dat die registrateur van die hoërhof ’n afskrif van die uitspraak vir die inspekteur-­generaal van die Namibiese polisie stuur.
Volgens getuienis wat in die hof gelewer is, het Katjivi gesê die werklike rede waarom hy vir Anton vermoor het, was omdat hy moeg geword het van die situasie waar hy altyd beskuldig is dat hy haar wou doodmaak. Dit, het hy gesê, het hom so vertoorn dat hy besluit het om haar dood te maak om ’n einde aan alles te maak. Tydens die aanval op Anton het hy ook vir Alfeus Haurumbu en Bertha Eises, wat haar te hulp wou snel, met ’n mes aangeval. Haurumbu het daarin geslaag om uit sy pad te spring terwyl Eises deur Katjivi by die deur uitgestoot was.
Mnr. Afrika Jantjies het vir die be­skuldigde opgetree en me. Antonia Verhoef het die staat verteenwoordig.