Katutura-hospitaal skort dienste vir buitepasiënte op

Die Katutura-hospitaal het sy dienste vir buitepasiënte opgeskort. Weens die hoë en toenemende aantal Covid-gevalle in die gemeenskap en die hospitaal, is dié departement nou 'n tydelike ruimte vir positiewe pasiënte wat suurstof ontvang en wag vir plasing in 'n beskikbare bed. Die opskorting van dienste sal tot verdere kennisgewing geld.

Volgens die adjunk uitvoerende direkteur in die ministerie van gesondheid en maatskaplike dienste, me. Petronella Masabane, is gesondheidsentrums en klinieke die eerste punt van sorg vir pasiënte. Pasiënte wat na 'n hospitaal verwys moet word en wat na die Katutura-hospitaal sou gaan, sal nou by die Windhoek Sentrale Hospitaal se departement vir buitepasiënte gesien word. Die ongevalle-afdeling is steeds by Katutura beskikbaar.