Katte help eensaamheid hokslaan

Tanja Bause“Hier binne het mens ’n dier soos ’n kat of voël nodig om jou te laat voel jy is deel van die lewe daar buite. Hulle is vry en dit laat my vry voel. Hulle laat my nie alleen voel nie.”So vertel Kallie Titus, ’n gevangene in die Windhoek Sentrale Gevangenis wat vir vier katte van die gevangenis sorg. Die katte is ’n paar jare gelede deur die owerhede in die gevangenis geplaas om muise onder beheer te hou. “Ek sorg vir Katrina, China, Babsie en nog ’n babakat. Hulle gee vir my al die liefde wat ek nodig het en vat my eensaamheid weg. Hulle hou my besig; ek kan nie my lewe sonder my katte voorstel nie.”Volgens kommissaris Veikko Armas is die katte vir gesondheidsdoeleindes na die gevangenis gebring en hou hulle die muise uit die stoorkamers en kombuis.“Hulle is ingebring vir plaagbeheer, maar ons beamptes kan nie vir hulle die nodige aandag en liefde geen nie. Die katte het nie net kos nodig nie, hulle het aandag en liefde nodig en dis waar die gevangenes inkom. Diegene met goeie harte het hulle oor die katte ontferm en sorg vir hulle. Talle gevangenes plaas ook kos vir die wilde katte uit, wat net kom eet en weer gaan. Ons het seker so tien katte wat hier op die perseel bly.”Astrid Stuurman, ’n verpleegster by die gevangenis, het omgesien dat die katte nie aanhou teel nie. Sy vertel: “Ek het op Facebook die Cat Protection Society of Namibia (CPS) gekontak en vir hulp gevra. Hulle het drie wyfiekatte gevang en reggemaak. “Ek self het nog my hele lewe lank katte om my gehad en is baie lief vir hulle. Ek het ook twee van die gevangenis se babakatjies aangeneem.”Volgens Inger Price van CPS het hulle nou die drie met die hulp van Windhoek Animal Hospital laat steriliseer. “Windhoek Animal Hospital het die drie kosteloos vir ons gesteriliseer en hulle sal nog twee volgende jaar kastreer. Ons sal seker so omtrent tien katte in geheel laat regmaak. Ons het ook kattekos saam met hulle na die gevangenis terug gestuur.”Titus sê: “Katte is lieflike diere en as jy hulle nie wil hê nie of nie vir hulle kan sorg nie, gee hulle dan vir iemand wat vir hulle sal sorg. Moet hulle nie mors nie. Hulle het so baie liefde om te gee. Al ons katte is vry om te gaan, maar hulle bly hier, want dis hulle veilige tuiste.” – tanja@republikein.com.na

Katte help eensaamheid hokslaan

Kommentaar

Republikein 2026-02-03

Meld asseblief aan om kommentaar te lewer

Katte help eensaamheid hokslaan

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.