Kan Rusch weer koning kraai?

Tielman van Lill - Lede van die Namibiese Enduroklub is gretig om die pad na Gobabis aan te pak waar die openingskompetisie vir die 2019-enduroseisoen Saterdagoggend aangebied gaan word.Gobabis is 'n nuwe venue wat gekies is en ryers kan sake Saterdag by die Tilda Viljoendam en omgewing in verskeie klasse uitspook. By die dam en omgewing is die terrein ideaal vir endurorenne waar ryers hul vaardigheid oor ruwe en soms bykans onbegaanbare terrein sal moet uitstal. In enduro-ritte tel spoed nie, maar wel die deelnemers se vernuf om suksesvol oor rotse, diep klowe, slote, steil en klipperige hellings asook sanderige riviere te navigeer. In die proses moet ryers sorg dat hulle nie transpondermerkers op die uitgemerkte roete misry nie, want só 'n glips kan 'n deelnemer 'n tydboete op die hals haal wat kampioenskapspunte kan kos.Deelnemers het vyf klasse waarin hulle kan inskryf. Die uitdagende kompetisie bestaan uit 'n 28 kilometer seksie vir die meer ervare en senior ryers, asook 'n 20 km skof vir die jonger garde.'n Hele paar verstellings is aan die klasse aangebring wat ook die ontwikkelingsryers insluit. Van die ontwikkelingsryers van 2018 sal vanjaar ouer en met meer ervaring en finesse aan hoër afdelings kan deelneem, wat vir interessante uitslae kan sorg.Die ontwikkelingsklas is en bly steeds 'n belangrike aspek vir die Namibiese Enduroklub waar die ryers nie jonger as 14 jaar mag wees nie. Ouers of ervare senior ryers moet die jong geesdriftige deelnemers op hul roete vergesel.Die inskrywings vir Gobabis sluit vandag om 20:00. Dus sal voornemende deelnemers moet wikkel om betyds hul registrasie in te handig. Deelnemers moet sorg dat hulle Saterdagoggend halfagt by die venue aanmeld om die nodige formaliteite af te handel. Die eerste ryers sal om 10:00 wegspring en belangstellendes word vriendelik deur die klub en sy lede genooi om 'n draai by die aksie te gaan maak.2018 SE WENNERSVerlede jaar se nasionale kampioen in die ope klas was Henner Rusch (ryer nr. 11) met vyf oorwinnings en 134 punte, gevolg deur Günther Gladis (nr. 4) met 77 en Heiko Stranghöner (nr. 273) met 68 derde. Rainer Sentefol (68 punte) en Nickle Visser (67 punte ) kan in 2019 sekerlik hul uitdaging aan die 2018-wenners rig.Die senior klas (38 jaar en ouer) is deur nr. 27 Jörn Greiter met 109 punte as kampioen oorheers, met nr. 20 Werner Wiese op 108 punte tweede. Derde was nr. 48 Martin Kruger met 106 punte.Oliver Rohrmüller (nr. 14) is met 120 punte die nasionale kampioen in die ondersteuningsklas, terwyl nr. 88 Jurgen Gladis met 85 tweede geplaas was. Ook met 85, is Jaco Husselman (nr. 33) wat die derde plek ingeneem het. Quinton van Rooyen junior het goeie vordering in 2018 getoon om met net een punt minder algeheel vierde te eindig. Hy sal gewis vanjaar dopgehou moet word.In die beginnersklas het JL Opperman (nr. 86) sy staal met ses oorwinnings en 120 punte gewys om die nasionale kampioenskap op te raap. Rhys Cragg (nr. 24) op 84 was tweede en André Marais (nr. 271) op 83 in die derde posisie. Opperman kon net in een byeenkoms weens 'n pap band nie sy aanslag voltooi nie.'n Deelnemer moet ten minste vier kampioenskapsbyeenkomste voltooi om vir die nasionale kampioenskap in aanmerking te kom.Program: Die jaar se sewe nasionale kampioenskapsbyeenkomste is soos volg geskeduleer: 1 Gobabis 16 Maart. 2 Lichtenstein-plaas 13 April. 3 Uis 15 Junie. 4 Tsumeb 13 Julie. 5 plaas Hoff 10 Augustus. 6 Karibib 21 September. 7 Kupferberg 19 Oktober.Vir meer inligting kan www.namibianenduro.com, of hul Facebook-blad besoek word.

Kan Rusch weer koning kraai?

Kommentaar

Republikein 2025-06-20

Meld asseblief aan om kommentaar te lewer

Kan Rusch weer koning kraai?

Kommentaar

Republikein 2025-06-20

Meld asseblief aan om kommentaar te lewer

MELD AAN

Advertensie