Kan ekonomie uit resessie loswikkel?

Jo-Maré Duddy - Minstens N$27,8 miljard – teen konstante pryse van 2010 - sou in die eerste kwartaal vanjaar in die ekonomie moes invloei om Namibië uit sy resessie te lig.Alle oë is op die Namibië Statistiekagentskap (NSA) wat na verwagting vandag sy verslag oor die bruto binnelandse produk (BBP) vir die eerste drie maande van 2017 sal vrystel.Namibië het 2016 in 'n resessie afgesluit ná die land in die derde en vierde kwartale jaar op jaar negatiewe groei aangeteken het. Voorlopige data van die NSA het ook negatiewe groei van -1,5% in die tweede kwartaal van 2016 getoon, maar dit is intussen na 0,1% hersien. Volgens beskikbare syfers het die ekonomie egter in die laaste kwartaal verlede jaar met -3,1% gegroei en die drie maande daarvoor met -0,8%. 'n Land is tegnies in 'n resessie as dit twee opeenvolgende kwartale op 'n jaargrondslag negatief groei.In die eerste kwartaal van 2016 was Namibië se BBP N$27,856 miljard. Dié BBP is nie gemeet aan markpryse nie, maar aan konstante pryse van 2010 wat vir inflasie aangepas is. Konstante pryse word as die maatstaf vir ekonomiese groei gebruik.As Namibië nie opnuut negatiewe groei wil behaal en in 'n resessie wil bly nie, moes die BBP in die eerste kwartaal vanjaar dus minstens dié bedrag beloop het. Alternatiewelik moet die hersiene syfers vir die vierde kwartaal positief wees sodat twee opeenvolgende negatiewe kwartale vermy kan word.InkrimpingSimonis Storm (SS) verwag nie goeie nuus van die NSA nie.Purvance Heuer, 'n direkteur van SS, sê 'n groot deel van hul ekonomiese vooruitsig vir 2017 was op die bydrae van Swakop Uranium se nuwe Husab-myn geskoei.“Hoewel Husab sy eerste drom (uraan) geproduseer het, verneem ons niks is tot dusver uitgevoer nie. Dit beteken daar is in dié stadium geen bydrae tot die BBP nie,” het Heuer aan Republikein gesê.SS het verlede jaar in sy vooruitsig vir 2017 gesê ekonomiese groei van 2,8% word vir vanjaar verwag. Verwyder Husab uit die prentjie en die verwagte groei val tot 0,4%.“Ek vermoed dié 0,4% is in dié stadium ook optimisties, aangesien bedrywighede steeds afneem, werkloosheid styg en bankrotskappe en beslagleggings toeneem,” sê Heuer.Frans Usiku, ekonoom van SS, sê groei van -1% word vir die eerste kwartaal verwag. 'n Styging in diamantverkope sal vir 'n kleiner inkrimping as dié van die laaste kwartaal van 2016 sorg. Die inkrimping in regeringsbesteding, veral op ontwikkeling, gaan egter steeds die ekonomiese groei demp, sê hy.“Die regering verteenwoordig sowat 45% van die BBP. Konstruksiebesteding is in die halfjaarbegroting van 2061-'17 met 41% afwaarts aangepas, terwyl geen begrotingstoewysings vir nuwe kapitaalprojekte in 2017-'18 gemaak is nie,” sê Usiku.'Gedemp'Hoewel hulle nie eintlik kwartaallikse BBP-voorspellings waag nie omdat die syfers te wisselvallig is en beduidend hersien word, verwag Cirrus Capital “gedempte” groei vir die eerste kwartaal.Rowland Brown, medestigter van Cirrus, sê groei in die eerste kwartaal van 2016 was “relatief” sterk, terwyl die eerste kwartaal vanjaar weens onder meer die begrotingsbesnoeiings in Oktober, asook likiditeits- en kontantvloeikwessies “relatief moeilik” was.'n Herstel in mynproduksie – veral uraan en diamante – en landbou kan die uitwerking van bogenoemde faktore tot 'n mate versag, maar hy verwag nietemin 'n algehele gedempte vertoning in die eerste kwartaal.

Kan ekonomie uit resessie loswikkel?

Kommentaar

Republikein 2026-06-19

Meld asseblief aan om kommentaar te lewer

Kan ekonomie uit resessie loswikkel?

Kommentaar

Republikein 2026-06-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.