Kan die president van Afrikaans tog net hand opsteek?

“Hallo Ment, Ek gee jou die garansie dat ek in die ataksie van my studeerkamer met elan die remanente woorde intyds vir jou sal stileer.”
Ek hou dadelik op lees en bel my suster in Pretoria.
“Ilana!” sê ek sonder dagsê. “Wanneer laas het jy met Ma gepraat? Daar’s groot fout. Ek het die vreemdste e-pos van haar gekry. Dit klink of sy . . . yl.”
“Kalm, kalm,” sê Ilana. “Ek is in die kar, op pad werk toe. Lees vir my wat skryf sy.” Ek lees.
“Ten spyte van my studeerkamer se toestand is ek self darem nie in harlaboerla nie. So, tolereer my, asseblief. Ek is nie erudiet nie, maar sal my bes doen en asmede meer.
“Familienuus: Ons neef Pieter is mos die tropsluitertjie. Dit is seker humaan dat hy baie deur sy ouers en susters bederf is. Ek glo egter sy luiheid emaneer uit sy manier van grootword. ‘n Mens het somtyds gewens ‘n eskulaap kon hom 'n injeksie gee of ‘n panasee toedien om hom te agiteer om iets met sy lewe te doen.
“Maar daar het ‘n lumen in die tonnel gekom. Sy buurman gee aan hom ‘n hoop reglette en hy begin kreëer die mooiste houtkassies daarmee en verkoop dit. Omdat mense hom prenumereer, kan hy nou effisiënt te werk gaan, nog hout aankoop. Die bombarie van sy pa se saagmasjien maak glo almal gek. Maar hy werk daagliks febriel voort. Hy etaleer glo sy produkte by die naaste inkoopsentrum.
“Ons neef Anton het ‘n stuk grond gekoop en begin boer. Ek vertrou dit is nie illegaal om so naby die dorp plaasdiere aan te hou nie.
“Daar is ‘n groot gora waarom hulle heerlik graas. Hy het ook ‘n groot gô opgesit om die voëls weg te hou van sy aangeplante groente. Wat nig Ellen betref, sy was toe haar ouers se enigste benefisiant. Dit het haar genadiglik gered van faillissement.”
“En dis dit,” sê ek. “En hoekom lag jy?”
“Ontspan,” sê Ilana. “Ma het begin blokkiesraaisels invul. Sy is maar net knorrig oor van die tydskrifte se blokkiesraai-Afrikaans. Dis al.”
Ons groet en ek gaan haal ‘n verklarende woordeboek om my ma se brief te kan ontsyfer. Sowaar, die woorde bestaan.
Ek wil graag die president van Afrikaans ontmoet, want sy (of haar) Huis is nié in orde nie. Die ministers, onder meer die Handwoordeboek van die Afrikaanse Taal, die Afrikaanse Woordelys en Spelreëls en die Skryf Afrikaans van A tot Z, verskil op soveel punte, dit verwar die volk en lei tot onnodige en soms uiters gevaarlike uitbarstings.
Ofte wel, sê die AWS. Óf oftewel.
Nee, sê die HAT. Dis oftewel, basta.
Mediese fonds, maar mediesefondsbydrae, beveel die AWS.
Die HAT swyg in die verband.
Maar die SAAZ, hoofopruier, het wel ‘n ekstra bont eier te lê: “Gebruik die geregistreerde naam van ‘n spesifieke fonds of skema. Gebruik oorkoepelend eerder ‘mediese skemas’ omdat daar baie soorte fondse en skemas/planne/keuses is, hoewel kortweg en ter afwisseling ook van ‘siekefondse’ gepraat mag word. Werknemers behoort tot (NIE: aan) ‘n mediese fonds.”
My presieuse hoof pulseer.
Los tog die gekarring aan die reeds uiters verwarrende, frustrerende taal- en spelreëls wat - so lyk dit my - elke jaar verander word.
Kan die kenners in beheer ook net vir my sê wat is ‘n hoëresolusiesyaftassonarbeeld?