Kamanjab se perdfluisteraar wil lewenslesse deel
Meisies wat aanklank kan vind by perde en die taal verstaan waarin die diere "praat", word gemoedeliker in hul optrede teenoor ander mense. Hulle tree pro-aktief op en is meer betrokke by wat hulle self of mense om hulle sê, deur liggaamstaal te verstaan en tussen die reëls te lees.
Die diep begrip van die self in jong meisies het Annerie Mare van Kamanjab op ver paaie tot in Amerika gestuur, om haar geestelike volheid te gaan soek, haarself beter te leer verstaan en ’n hand vol liefde te versamel, wat sy binnekort na haar geliefde Namibië wil terugbring om hier met ander jong Namibiese meisies te deel.
Die Eagles Wings Educational Girls Home het tussen die klipkoppies van die Kunenestreek deur die kuberruim op Annerie se rekenaarskerm vir haar die boodskap gestuur van goedheid en jongmeisiesdrome op ’n perdeplaas in Amerika waar “horse whispering” die leerboek is waaruit meisies tussen die ouderdomme van 11 en 18 jaar hul weg na selfontdekking kan volg.
Die nie-winsgewende organisasie wat vir Annerie ’n huis weg van die huis geword het sedert sy in 2011 daarvan gelees het, het haar nou genoop om voluit daaraan te werk om op hul plaas, Arendsnes, naby Kamanjab haar kennis en ervaring te kom toepas ter ondersteuning van ons land se meisies wat na die saadjies van volle vrouskap soek om in die akkers van ’n beter Namibië te plant. Sy wil haar storie en haar kennis deel, sê sy in ’n passievolle brief uit Hedgeville, Wes-Virginia, in Amerika.
Sy het haar geleentheid in die Amerikaanse somer van 2013 gekry deur ’n volle beurs om vir ’n maand lank die geheimenisse op die godsdiensgegronde projek van Chris en Jeannie Ramsey te gaan deurloop. Die geleentheid is aangegryp en sy kan nie daaroor uitgepraat raak nie. Nou is dit vir haar ’n kwessie van terugploeg in die dorre aarde van Namibië.
“Eagles Wings gebruik perde en die interaksie in ’n perdetrop om jong meisies meer oor die lewe te leer. Om hulleself te leer verstaan en om God te verstaan,” verduidelik Annerie. Sy maak ook geen geheim daarvan dat haar ervaring by Eagles Wings in net een maand haar lewe onomkeerbaar verander het nie.
Haar besoek aan Eagles Wings in 2013 is op haar eie versoek opgevolg in Mei vanjaar, omdat sy gevoel het daar is soveel meer om te leer en te ervaar op die perdeplaas, ’n hanetreetjie van die Amerikaanse groot stede af. Haar geestelike lewe het verdiep en haar belangstelling in die leertegniek het toegeneem, verduidelik sy.
Vir Annerie het die pad na Eagles Wings vir ’n tweede keer oopgegaan toe sy in Bloemfontein tydens die All African Accelerated Christian Education (ACE) Student Convention aangewys is om na Amerika te gaan en teen Christen jongmense van oor die wêreld te gaan deelneem in ’n verskeidenheid dissiplines. Die hek het vir haar oopgegaan toe sy met haar verspring-vermoë gekies is om tydens die internasionale studentesaamtrek te gaan talente meet teen 2065 ACE studente vanuit 25 verskillende lande.
As Namibiese deelnemer het sy die landsvlag by die geleentheid vertoon waar in 140 items in vyf groepe deelgeneem is. Musiek, spraak en drama, atletiek, kuns en akademie was deel van die jongklomp se aktiwiteite en Annerie het ’n top-plek met fotografie losgeslaan.
Die geografiese nabyheid van Eagles Wings het haar genoop om ná die studentespele in die buurstaat by haar ou vriende op die perdeplaas te gaan aansluit vir die somerkamp vanjaar, waar sy tans dieper in die leerstellinge van die perdfluisteraars van Eagles Wings delf.
As ’n ou hand, is sy nou dieper betrokke, leer sy meer geheimenisse van die tegniek en raak sy, as Christen, meer betrokke by die verkondigingstudies.
“Ek het baie geleer en is ’n ander mens. My siening oor my land het verander. My hart vir jong mense in my land het gegroei en my passie vir die mense van my geslag het toegeneem. Ek het uitgevind wat ek sê en doen, kan ’n verskil maak in ander se lewens.
“Ek het die taal van perde leer verstaan. Ek weet hoe liggaamstaal en optrede mense raak. Deur ’n sterk en effektiewe kommunikeerder te wees, kan ek soveel doen. Deur pro-aktiewe denkwyses en optrede en die manier waarop ek myself aanwend in die geloof en gemeenskap, kan ek ’n bydrae maak. Mens leer krities dink en probleme oplos. Dit is ’n lewenslange leerproses,” skryf sy in ’n brief aan Namibië.
“Perde is reguit in hul optrede teenoor ons. Dit is ’n spieëlbeeld van ons siele. Goed en sleg. Perde daag ons uit om te kies om te verander of om te veg en te vlug, of om in vrees te leef. My hart gaan uit na die jong meisies in Namibië wat besluite oor hul lewens moet neem en sal graag ’n geleentheid vir hulle wil skep om te ervaar wat ek hier ervaar het,” spreek sy haar toekomsdrome uit.
Met die vasberadenheid wat Annerie Mare op haar tere ouderdom reeds gedemonstreer het, is ’n Namibiese weergawe van Eagles Wings dalk binnekort in die kliprante by Kamanjab ’n werklikheid.
Die Eagles Wings Educational Girls Home het tussen die klipkoppies van die Kunenestreek deur die kuberruim op Annerie se rekenaarskerm vir haar die boodskap gestuur van goedheid en jongmeisiesdrome op ’n perdeplaas in Amerika waar “horse whispering” die leerboek is waaruit meisies tussen die ouderdomme van 11 en 18 jaar hul weg na selfontdekking kan volg.
Die nie-winsgewende organisasie wat vir Annerie ’n huis weg van die huis geword het sedert sy in 2011 daarvan gelees het, het haar nou genoop om voluit daaraan te werk om op hul plaas, Arendsnes, naby Kamanjab haar kennis en ervaring te kom toepas ter ondersteuning van ons land se meisies wat na die saadjies van volle vrouskap soek om in die akkers van ’n beter Namibië te plant. Sy wil haar storie en haar kennis deel, sê sy in ’n passievolle brief uit Hedgeville, Wes-Virginia, in Amerika.
Sy het haar geleentheid in die Amerikaanse somer van 2013 gekry deur ’n volle beurs om vir ’n maand lank die geheimenisse op die godsdiensgegronde projek van Chris en Jeannie Ramsey te gaan deurloop. Die geleentheid is aangegryp en sy kan nie daaroor uitgepraat raak nie. Nou is dit vir haar ’n kwessie van terugploeg in die dorre aarde van Namibië.
“Eagles Wings gebruik perde en die interaksie in ’n perdetrop om jong meisies meer oor die lewe te leer. Om hulleself te leer verstaan en om God te verstaan,” verduidelik Annerie. Sy maak ook geen geheim daarvan dat haar ervaring by Eagles Wings in net een maand haar lewe onomkeerbaar verander het nie.
Haar besoek aan Eagles Wings in 2013 is op haar eie versoek opgevolg in Mei vanjaar, omdat sy gevoel het daar is soveel meer om te leer en te ervaar op die perdeplaas, ’n hanetreetjie van die Amerikaanse groot stede af. Haar geestelike lewe het verdiep en haar belangstelling in die leertegniek het toegeneem, verduidelik sy.
Vir Annerie het die pad na Eagles Wings vir ’n tweede keer oopgegaan toe sy in Bloemfontein tydens die All African Accelerated Christian Education (ACE) Student Convention aangewys is om na Amerika te gaan en teen Christen jongmense van oor die wêreld te gaan deelneem in ’n verskeidenheid dissiplines. Die hek het vir haar oopgegaan toe sy met haar verspring-vermoë gekies is om tydens die internasionale studentesaamtrek te gaan talente meet teen 2065 ACE studente vanuit 25 verskillende lande.
As Namibiese deelnemer het sy die landsvlag by die geleentheid vertoon waar in 140 items in vyf groepe deelgeneem is. Musiek, spraak en drama, atletiek, kuns en akademie was deel van die jongklomp se aktiwiteite en Annerie het ’n top-plek met fotografie losgeslaan.
Die geografiese nabyheid van Eagles Wings het haar genoop om ná die studentespele in die buurstaat by haar ou vriende op die perdeplaas te gaan aansluit vir die somerkamp vanjaar, waar sy tans dieper in die leerstellinge van die perdfluisteraars van Eagles Wings delf.
As ’n ou hand, is sy nou dieper betrokke, leer sy meer geheimenisse van die tegniek en raak sy, as Christen, meer betrokke by die verkondigingstudies.
“Ek het baie geleer en is ’n ander mens. My siening oor my land het verander. My hart vir jong mense in my land het gegroei en my passie vir die mense van my geslag het toegeneem. Ek het uitgevind wat ek sê en doen, kan ’n verskil maak in ander se lewens.
“Ek het die taal van perde leer verstaan. Ek weet hoe liggaamstaal en optrede mense raak. Deur ’n sterk en effektiewe kommunikeerder te wees, kan ek soveel doen. Deur pro-aktiewe denkwyses en optrede en die manier waarop ek myself aanwend in die geloof en gemeenskap, kan ek ’n bydrae maak. Mens leer krities dink en probleme oplos. Dit is ’n lewenslange leerproses,” skryf sy in ’n brief aan Namibië.
“Perde is reguit in hul optrede teenoor ons. Dit is ’n spieëlbeeld van ons siele. Goed en sleg. Perde daag ons uit om te kies om te verander of om te veg en te vlug, of om in vrees te leef. My hart gaan uit na die jong meisies in Namibië wat besluite oor hul lewens moet neem en sal graag ’n geleentheid vir hulle wil skep om te ervaar wat ek hier ervaar het,” spreek sy haar toekomsdrome uit.
Met die vasberadenheid wat Annerie Mare op haar tere ouderdom reeds gedemonstreer het, is ’n Namibiese weergawe van Eagles Wings dalk binnekort in die kliprante by Kamanjab ’n werklikheid.
Kommentaar
Republikein
Geen kommentaar is op hierdie artikel gelaat nie