Kamanjab moontlik 'n 'broeiplek vir siektes'

Tanja BauseInwoners van Kamanjab in die Kunenestreek is keelvol vir hul dorpsraad. Hulle beskuldig die raad van wanbestuur en het hulself na die nuwe goewerneur van die Kunenestreek, mnr. Marius Sheya, vir ingryping gewend.“Ek het klagtes ontvang en die raadslede aangesê om daarop te antwoord. Dit is húl mandaat om daarop te reageer,” het Sheya gesê. Die hantering van die stortingsterrein is onder meer 'n klagte. “Vir die afgelope twee jaar is daar geen draad om die stortingsterrein nie en die vullis waai die hele plek vol. Die asgate is langs die informele nedersetting geleë. Die kinders loop deur die rommel. Dit is nie net gevaarlik nie, maar ook 'n moontlike broeiplek vir allerhande siektes,” is een van die klagtes. Volgens 'n inwoner is die “asgate” nie 'n gat nie, en word vullis langs die pad of in die rivier gestort. Dit word volgens hulle nie begrawe, verbrand of hoegenaamd reg bestuur nie. “As dit reën en die rivier kom af, het ons groot probleme met rommel. Die rivier loop deur die nedersetting en die rommel sal nog meer tussen die mense versprei word. Hier word ook ou vleis en velle weggegooi. Dit stink verskriklik en is baie onhigiënies,” sê die inwoner. Omdat daar volgens inwoners geen beheer by die asgate is nie, is die pad wat na die oorspronklike asgate toe lei glo toe onder rommel. Volgens klagtes wat aan Sheya gestuur is, loop die riool direk in die rivier in. “Die dreineringsgate loop nou al vier jaar lank oor. Die water loop nie in opgaardamme in, waar dit behandel kan word nie. Dit loop direk in die rivier in en van daaraf direk in 'n dam in. Die damme word deur die vuil water besoedel. Cholera en hepatitis wag net om uit te breek,” is in dié klagtes genoem.Aan die begin van die jaar het 'n inwoner uit Kamanjab soortgelyke klagtes aan Republikein gerapporteer. “Ek kan nie slaap nie, want ek kan nie my huis se vensters oopmaak nie. Die riool loop in die straat af en dit stink ongelooflik. Ek het nou al verskeie kere by die dorpsraad gekla, en hulle doen net mooi niks. Dit is vuil hier in die straat voor my huis en ek is bang vir siektes,” het hy gesê. Op 5 Februarie het 'n voertuig op die dorp aan die brand geslaan. “Ons het die brandweer self ontbied, maar soos gewoonlik het die brandweerwa nie uitgekom nie. Hulle het die voertuig laat uitbrand. Die dorpsraadvoertuie is nie padwaardig nie, of die bestuurders beskik nie oor 'n wettige rybewys of die nodige opleiding om bystand in 'n brand te kan bied nie,” het hy gesê. Die brief is op 7 Februarie aan die goewerneur se kantoor gestuur en ontvangs is erken. Op 8 Februarie het Republikein navrae aan dieselfde e-posadresse gestuur en geen bevestiging of reaksie ontvang nie.Herhaalde oproepe en e-posse aan die dorpsraad en die waarnemende uitvoerende hoof, mnr. Jakobus Namaseb, is ook nie beantwoord nie.

Kamanjab moontlik 'n 'broeiplek vir siektes'

Kommentaar

Republikein 2025-11-05

Meld asseblief aan om kommentaar te lewer

Kamanjab moontlik 'n 'broeiplek vir siektes'

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.