Kalender 27 September

Nou aan die gang» Die Katurura Modeweek skop vandag by die Katutura Jeugsentrum in die hoofstad af. Dié geleentheid is gemik op modeliefhebbers en –ontwerpers. Die modeweek bestaan uit loopplanktentoonstellings en seminare. Die volledige program is op whatsonnamibia.com.na. Toegang tot die meeste geleenthede is gratis. » Die gewilde Windhoek City Market is weer terug. Vanaand se tema is “Gin & Jazz”. Geniet die lieflike klanke van jazz-musiek deur talentvolle, plaaslike musikante terwyl jy aan ‘n wye verskeidenheid plaaslike en internasionale jenewers proe. Die geleentheid is die plek waar ou vriende mekaar weer raakloop of om 'n paar nuwes te maak. Die mark begin om 16:00 en kaartjies kan teen N$40 aanlyn by PayToday of by die deur gekoop word. »Die Namibiese Filmkommissie (NFC) se filmweek duur nog tot môre. Dis ter onderdersteuning van plaaslike rolprentmakers en in aanloop tot die Namibiese Teater- en Filmtoekennings wat op 5 Oktober plaasvind. Vanaand se vertonings begin om 18:00 by die Katutura-gemeenskapkunssentrum (KCAC) en môre om 19:00 by The Barn. Gebruik die hutsmerk #NTFA2019 of besoek hul Facebookblad vir meer inligting. » Die Franco-Namibiese Kultuursentrum (FNCC) bied môre weer sy jaarlikse internasionale kos- en kunsvlytbasaar aan. Gaan maak ‘n draai en neem ‘n reis oor die hele wêreld met heerlike kos, drankies uit 20 lande, internasionale kuns, kersgeskenke en allerlei kunsvlytitems. Tydens die basaar sal musiek- en dansuitvoerings gelewer word. Die mark se hekke maak om 10:00 oop en toegang is gratis. Besoek die FNCC se webtuiste vir verdere inligting of gaan na alleventsinwindhoek.com/events. » Soul Music Industry bied môre die vierde Olmeca Soul Train-avontuur aan. Trek solank jou dansskoene aan, want dit gaan ‘n fees wees. Die trein vertrek stiptelik om 14:00 van die Windhoek-stasie en sal om middernag weer terug in die hoofstad wees. Pendeldienste is beskikbaar vir diegene wat vroeër wil vertrek. Kaartjies is by EventsToday en PayToday beskikbaar. Vir meer inligting besoek whatsonnnamibia.com. » Die Goethe-instituut bied môre weer die Namibia Arts Fair aan. Dit is 'n tweejaarlikse kunstefees waar kunstenaars en hul kunswerke blootstelling op plaaslike en internasionale vlak kry. Die feeskomitee wil daarmee die uitstal en aankoop van Namibiese kuns- en kunswerke vergemaklik, asook moontlike verwarring oor moderne Namibiese kunstenaars aanspreek sodat kunstenaars geld met hul kuns kan verdien. » Die Stephanus-kerk by Kenneth Kaundastraat 3 in Klein Windhoek bied elke Saterdag van 08:00 tot 12:00 ’n biomark aan. Alle produkte wat by die mark verkoop word, is tuisgemaak of plaaslik gekweek. » Die Groensentrum op Swakopmund hou Sondag weer sy Sondagmark. Dis 'n heerlike buiteluggeleentheid vir die hele gesin. As jy op soek is na kuns, kunsvlyt, handgemaakte geskenke, tweedehandse produkte of selfs ‘n paar Kersgeskenkies, is dié mark net vir jou. Die toegang is gratis. Kontak Bea by 081 698 9072 vir meer inligting. Maandag » Showcase Namibia is ’n geleentheid vir toeriste en Namibiërs om tradisionele danse en plaaslike musiek saam te geniet. Dis ’n gereelde instelling by die Warehouse-teater en word elke Maandag aangebied. Toeriste word aangemoedig om deel te raak van ’n interaktiewe show van 45 minute. Kaartjies is teen N$170 by die deur beskikbaar. Dit begin om 16:15. Vir meer inligting, besoek die Warehouse-teater se Facebook-blad. Dinsdag » Dinsdag is karaoke-aand by die Boiler Room by die Warehouse-teater. Dit begin om 20:00 en hou tot laataand aan. Toegang is gratis. Drankies is by die kroeg en etes by die restaurant beskikbaar.» Fotografiedosent Djunior Svane bied werkwinkels in digitale fotografie vir beginner- en gevorderde studente aan. Vir meer inligting, skakel Djunior by 081 245 2279. Woensdag » Drum Café Namibia, in samewerking met Joe's Beerhouse, bied elke Woensdag van 18:00 tot 19:00 ’n openbare tromslaansessie in die boma by Joe’s aan. Almal is welkom. ’n Beperkte aantal djembe-tromme word voorsien, maar entoesiastiese tromslaners word aangemoedig om hul eie tromme saam te bring. Die sessies is gratis, maar skenkings is welkom. Donderdag » Die Jazz Etcetera-geleenthede by die Hilton se Kalabar vind elke Donderdag tussen 19:00 en 21:30 plaas en toegang is gratis. Almal is welkom.» FreeYourMind bied vanaand The Gwarra of Michael Amushelelo by die NamPower-konvensiesentrum aan. “Gwarra” is die Namibiese weergawe van die bekende Amerikaanse-konsep roasting. ‘n Roast of roasting bestaan uit ongeveer agt tot tien komediante of bekendes wat ‘n spesifieke persoon spottenderwys slegsê. Die hoogtepunt is wanneer dié persoon, in die geval Michael Amushelelo, daarna die span hul eie medisyne voer. Die show begin om 20:00 en kaartjies kan vanaf 19:00 teen N$150 by die deure gekoop word.

Kalender 27 September

Kommentaar

Republikein 2026-05-05

Meld asseblief aan om kommentaar te lewer

Kalender 27 September

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.