Kalender 1 Maart

Nou aan die gang

» Sluit by die Namibiese rocker John Rock Prophet aan, waar hy vanaand by The Loft (by die Warehouse-teater) om 19:00 ’n onvergeetlike show gaan doen. John Rock Prophet, ’n gebore Windhoeker, het sy eerste kitaar op laerskool verdien ná sy pa vir hom belowe het om sy eerste kitaar te koop sodra hy sy eerste liedjie kan speel. Op 12 het hy toe sy vriend se kitaar geleen en heelaand geoefen. Toe hy sy eie weergawe van “Suikerbos” vir sy pa speel, is hy en sy pa in hul rooi Ford Cortina musiekwinkel toe. Hy het begin skryf en sy talent was duidelik. Sy nuutste album Verhoogde Standaarde staaf sy waardering van nostalgie. Kaartjies is by die deur teen N$50 beskikbaar. Vir meer inligting, besoek die Warehouse-teater se Facebook-blad.

» Beat Street is vanaand by die Boiler Room in die Warehouse-teater op die planke. Van die mees outentieke hip-hopliedjies kan by die show verwag word. DJ Soulfood en DJ Musketeer sal jou heupe behoorlik loskry. Toegang is gratis en deure maak om 20:00 oop. Vir meer inligting, besoek whatsonnamibia.com.na

» Dis weer tyd vir die Kasi Vibe-fees. "Kasi" is ’n algemene term onder jongmense, wat verwys na die plek waar jy grootgeword het. Dit is teen hierdie agtergrond dat die fees gevier word. Dit vind vandag en môre om 10:00 by die Sam Nujoma-stadion plaas. Kaartjies kos N$40 by die hek. Kinders onder agt se toegang is gratis.

» Big Ben en sy band sal hul jaar van shows met ’n amptelike konsert in Windhoek vier. Ná verlede jaar se suksesvolle konsert op 2 Februarie beweeg die konsert vanjaar na 'n groter venue – Zoo Park. Dit sal ook sy nuutste treffer, “102”, se bekendstelling wees en Big Ben beloof om sy nuutste en oudste liedjies te speel. Die konsert begin om 19:00. Kaartjies is by Webtickets en Pick n Pay beskikbaar.

» Die Stephanus-kerk by Kenneth Kaundastraat 3, in Klein Windhoek, bied elke Saterdag van 08:00 tot 12:00 ’n biomark aan. Alle produkte wat by die mark verkoop word, is tuisgemaak of plaaslik gekweek.

Maandag

» Showcase Namibia is 'n geleentheid vir toeriste en Namibiërs om tradisionele danse en plaaslike musiek saam te geniet. Dis ’n gereelde instelling by die Warehouse-teater en word elke Dinsdag aangebied. Toeriste word aangemoedig om deel te raak van ’n interaktiewe show van 45 minute. Kaartjies is teen N$170 by die deur beskikbaar. Dit begin om 16:15. Vir meer inligting, besoek die Warehouse-teater se Facebook-blad.



Dinsdag

» Dinsdag is karaoke-aand by die Boiler Room by die Warehouse-teater. Dit begin om 20:00 en hou tot laataand aan. Toegang is gratis. Drankies is by die kroeg en etes by die restaurant beskikbaar.

» Fotografiedosent Djunior Svane bied werkwinkels in digitale fotografie vir beginner- en gevorderde studente aan. Vir meer inligting, skakel Djunior by 081 245 2279.

Woensdag



» Die Duitse week skop vandag op Swakopmund af. Besoek die Goethe-Institut se webtuiste vir die volledige program en alle vermaak tydens die week.

» Dansers Christopher Roman en Brit Rodemund voer choreograaf William Forsyth se duet Catalogue vir die eerste keer vanaand om 19:00 by die Warehouse-teater uit. Kaartjies is teen N$80 by die deur beskikbaar.



» Drum Café Namibia, in samewerking met Joe's Beerhouse, bied elke Woensdag van 18:00 tot 19:00 ’n openbare dromslaansessie in die boma by Joe’s aan. Almal is welkom. ’n Beperkte aantal djembe-dromme word voorsien, maar entoesiastiese dromslaners word aangemoedig om hul eie dromme saam te bring. Die sessies is gratis, maar skenkings is welkom.



Donderdag

Die Jazz Etcetera-geleenthede by die Hilton se Kalabar vind elke Donderdag tussen 19:00 en 21:30 plaas en toegang is gratis. Almal is welkom.