Kabinet: Oorweeg samewerking met China

Namibië se kabinet het ’n hoëvlak- tegniese komitee aangestel om die implementering van ooreenkomste met China te behartig. Dít volg op 'n verslag oor die Forum vir China-Afrika samewerking waaraan Namibië vroeg in September vanjaar deelgeneem het. Namibië sal met samewerking met China voortgaan deur politieke samesprekings, terwyl die ministerie van internasionale betrekkinge en samewerking opdrag gegee is om die moontlikheid van die samestelling van 'n gesamentlike kommissie tussen dié twee lande te ondersoek. Ministerie van internasionale betrekkinge en samewerking: Namibië sal soortgelyke byeenkomste in die toekoms bywoon, onder meer die tweede Belt and Road Forum for International Cooperation wat volgende jaar in China plaasvind, die vyfde politieke samesprekings tussen China en Afrika se ministers van buitelandse sake by die Verenigde Nasies (VN) se algemene vergadering in September 2019, en die agtste ministeriële konferensie wat volgens plan in 2021 in Senegal sal plaasvind. Ministerie van nywerheidsontwikkeling, handel en SME-ontwikkeling: Dié ministerie moet verseker Namibiese besighede neem aan die byeenkoms vir openbare ondernemings en internasionale in- en uitvoere in Shanghai in November vanjaar deel. Hy moet ook amptenare na die Namibiese ambassade in Beijing stuur, gegewe China en Afrika se toenemend sterker ekonomiese bande.Die ministerie van landbou, water en bosbou: Dié ministerie moet ondersoek hoe Namibië kan baat by China se aanbod om Afrikalande met kapasiteitsbou en tegnologie-oordrag te help. Die uitruil van landbouwetenskaplikes moet oorweeg word, asook die toepassing van nuwe navorsingstegnieke. Die ministerie moet oorweeg of Namibië ’n China-Afrika-navorsingsentrum vir die ontwikkeling van landbou wil huisves. Ministerie van werke en vervoer: Dié ministerie moet China se aanbod oorweeg om lugvaartpersoneel op te lei en kapasiteit te bou om aan internasionale praktyke en standaarde te kan voldoen. Ministerie van myne en energie: China se aanbod om ’n gesamentlike navorsingsentrum vir geowetenskaplike samewerking en ’n sentrum vir samewerking op die gebied van energietegnologie in Afrika op te rig, moet oorweeg word. China het ook opleiding vir Afrika-amptenare in die bestuur van kragstelsels aangebied, wat oorweeg moet word. Ministerie van visserye en mariene hulpbronne: Dié ministerie moet China se aanbod vir tegniese ondersteuning en kapasiteitsbou deur samewerking met Chinese maritieme instellings en mariene navorsingsinstellings oorweeg. Ministerie van die omgewing en toerisme: Daar moet met China saamgewerk word wat verwoestyning, grondverswakking en droogtebestuur betref. Namibië se gebruik van satellietdata in die voorkoming van rampe moet ondersoek word. Hulle moet ook oorweeg of Namibië ’n sentrum vir omgewingsbewaring en klimaatsverandering moet huisves.Ministerie van finansies: Dié ministerie moet met China saamwerk om belastinginvordering en administrasie te verbeter en China se lenings vir die bevordering van vervoerinfrastruktuur oorweeg. Die kantoor van die eerste minister moet uitruilprogramme en samewerking tussen die Namibië Instituut vir Openbare Administrasie en Bestuur (Nipam) en die Suid-Suid- samewerkings- en ontwikkelingsinstituut ondersoek. Ministerie van onderwys, kuns en kultuur: China se aanbod om klein weerstasies by skole op te stel, moet ondersoek word. Ministerie van inligting en kommunikasietegnologie: Dié ministerie moet China se aanbod vir tegniese ondersteuning en opleiding vir radio- en televisie-ontwikkeling opvolg. Ministerie van sport, jeug en nasionale diens: China se aanbod vir uitruilgeleenthede vir jongmense, Chinese beurse vir Namibiese studente en die bevordering van jong vroue-entrepreneurs moet oorweeg word.Die ministeries van verdediging, en van veiligheid en sekuriteit is opdrag gegee om Chinese samewerking te oorweeg in terme van openbare veiligheid, die bewaring van vrede, kuberveiligheid en terrorisme. Hulle moet China se hulp op die gebiede van die insameling van inligting, veiligheid, verdediging, militêre mediese wetenskap en personeelopleiding oorweeg. Die Teenkorrupsiekommissie moet China se aanbod om ’n 100 amptenare jaarliks van volgende jaar af tot 2021 oorweeg, terwyl die nasionale beplanningskommissie alles moet koördineer.

Kabinet: Oorweeg samewerking met China

Kommentaar

Republikein 2025-05-14

Meld asseblief aan om kommentaar te lewer

Kabinet: Oorweeg samewerking met China

Kommentaar

Republikein 2025-05-14

Meld asseblief aan om kommentaar te lewer

MELD AAN

Advertensie