Kabeljou plant die uitklophou op Bonanza

Des Erasmus Ná 'n week waarin groterige steenbrasse die groter kabeljoue net onder die stertvin gekrap het, was daar gistermiddag om vieruur toe die skaal in die Bonanza-tent op Hentiesbaai gesluit het, maar net een wenner. Dit was 'n kabeljou van 18,205 kg wat toe al langer as 'n uur as vertoonstuk aan die weegmeesters se balk van kampioene gehang het. Vir die kampioenhengelaar, Pierre Cronjé van Stellenbosch, was die wagtyd een van die langste ure van sy lewe. Enige oomblik kon 'n Bonanza-ganger met 'n groter vis as syne hom of haar by die weegmeesters aanmeld. Daarom het hy aanvanklik volstrek geweier om 'n foto van hom met sy vis te laat neem. Só 'n foto sou sy geluk laat draai en in die proses sou hy die massiewe pryspot van N$31 000 kwyt wees. Dit het nie gebeur nie, met sy enigste mededinging steeds deur kabeljoue. Selfs die naaste twee visse aan die kampioenvis van die dag was ook kabeljoue. Dit was Morné Fourie se kabeljou van 17,360 kg wat hy by Kruiskaap uitgehaal het. Dit het aan Morné die kategorieprys vir kabeljoue laat wen. Axel Parr se derde grootste kabeljou van die dag met 'n tweede plek in die kategorie was 'n vis van 15,430 kg. Die wensteenbras kon nie eens naastenby saamgesels nie. Dit was 'n steenbras van 9,325 kg wat Corné Burger ingeweeg het. Die plek van die vangs is nie verstrek nie – waarskynlik omdat Corné en sy manne weer daar wou gaan ingooi. As Stellenbosser was Pierre Cronjé omring deur sy eie applousbrigade. Toe die skaal gesluit het en Pierre die N$31 000 ryker was, het 'n applous opgegaan wat die tent se flappe laat beef het. En dit vir 'n vangs met 'n stukkie pelseraas en by Horingbaai noord van Hentiesbaai. Ook het die vangste die gebied noord van Hentiesbaai 'n gebiedswenner bo die Paaltjies suid van Walvisbaai gemaak waar die jaarlikse kabeljoutog teen die einde van verlede week die viskoors laat styg het. Axel Parr het die derde grootste kabeljou van die dag by die Vierde Paal suid van Walvisbaai gevang. Die kabeljou wat 'n derde plek in die kategorie ingeneem het, is deur Eddie Harvey by Dup se Gat noord van Hentiesbaai gevang. Die vis het die skaal op 6,295 kg getrek. Die Bonanza het gister gedeel in duisende toeskouers wat ook vir die strandrugbytoernooi opgedaag het. Sitplekke was skaars en onder elke woestynbos en op elke sandkol het 'n motor gestaan. Toe die skaal in die tent gesluit het, was die strandrugbytoernooi steeds aan die gang met die kwart- en halfeindstryde wat toe aangebreek het. Die twee tente saam het een kompleks gevorm waar Rooies van Namakwaland as verhoogkunstenaar gevra het wie het al die blomme van die suidgrens se buurman geplant. Die wengaljoen van die dag het 1,825 kg geweeg en is deur Nicky Enton by Myl 100 gevang. Junior Orffer se wenkolstert van 1,38 kg is by Myl 6 gevang. Die kompetisie vir roofvis is deur W. Kinneal gewen met 'n elf van 1,35 kg. Die wenbaber van die dag was Gerhard Stafford se vis van 0,815 kg.

Kabeljou plant die uitklophou op Bonanza

Kommentaar

Republikein 2025-06-18

Meld asseblief aan om kommentaar te lewer

Kabeljou plant die uitklophou op Bonanza

Kommentaar

Republikein 2025-06-18

Meld asseblief aan om kommentaar te lewer

MELD AAN

Advertensie