Kaap-rampvlieëniers se familie eis miljoene

Francoise Steynberg Hoewel die twee vlieëniers op 16 Augustus 2015 volgens 'n skadevergoedingseis die oorsaak van die E-Med Rescue 24-ambulanslugramp in die Kaap was, waarin hulle en hul drie passasiers gesterf het, eis drie familielede nou meer as N$12 miljoen. Die hoofvlieënier, mnr. Steven Naudé (53), se eksvrou en dogter, en sy medevlieënier, me. Amore Espag (23), se pa eis altesaam N$12 379 800 van Westair Aviation as eerste respondent, die Namibiese direktoraat van burgerlugvaartowerheid (DCAA) as tweede respondent, asook die minister van werke en vervoer en die prokureur-generaal.Die saak word môre in die hoërhof aangehoor.Naudé se eksvrou, me. Elana Naudé, wat ten tyde van die ongeluk weer saam met hom gewoon het, het maandeliks N$10 000 van hom ontvang en eis volgens sy lewensverwagting van nog 27 jaar N$3 253 200 vir die verlies van inkomste. Sy eis ook skadevergoeding weens emosionele skok en depressie, posttraumatiese stres, antidepressante-medikasie en psigiatriese behandeling van N$2,5 miljoen. Die hoofvlieënier se volwasse dogter, me. Rejancca Naudé, eis N$1 626 600 ook vir die verlies van 27 jaar se inkomste en N$2,5 miljoen vir skade weens emosionele skok en posttraumatiese stres. “Sy kan nie oor haar pa se dood kom nie en is oorafhanklik van haar ma vir sielkundige, emosionele, fisieke en finansiële steun. Sy kan nie as 'n normale volwassene in die samelewing en haar werkplek aanpas nie,” lui die hofdokument.Die medevlieënier se pa, mnr. Abraham Jacobus Espag, eis ook N$2,5 miljoen vir emosionele skok en gevoelens van eensaamheid en depressie.Espag het volgens die hofdokument 'n abnormale weersin in enigiets wat met lugvaart en vliegtuie te doen het.“ . . . hy voel verontrus, benoud en word kwaad as hy net die geluid van 'n vliegtuig hoor,” sê die hofdokument.'WESTAIR, DCAA NALATIG'Die eisers beweer in die hofdokument dat die ongeluk veroorsaak is deur die nalatigheid van die hoofvlieënier en/of die medevlieënier, die nalatigheid en roekeloosheid van Westair, asook die nalatigheid van die direkteur van die DCAA en/of hul werknemers, wie se aksies vir die gevolge verantwoordelik is. “Westair was roekeloos en alternatiewelik nalatig met die medevlieënier wat slegs 1,2 vlugure se ervaring op die Cessna 441 voor die ongeluksvlug gehad het. Die vlieëniers was ook nie vir die vlug geskeduleer nie,” lui die hofdokument.“Die hoofvlieënier was in die algemeen aan lang vlugure onderhewig sonder dat sy werklading en rusperiode voor 'n volgende vlug in ag geneem is - spesifiek op die dag toe hy die ongeluksvlug moes onderneem.”Volgens die eisers was “die DCAA roekeloos en alternatiewelik nalatig”, “onbevoeg” en “ondoeltreffend”, omdat daar 'n gebrek aan die Namibiese burgerlugvaartowerheid se toesig oor lugoperateurs in Namibië is.Volgens die Suid-Afrikaanse burgerlugvaartowerheid (Sacaa) se verslag was die Namibiese burgerlugvaartowerheid se vlugoperasie-departement se toesig oor die operateur “substandaard en in sommige gevalle was daar geen toesig nie weens beperkte personeel- en finansies”. Voorts lui dit dat die lugverkeerdienste in Namibië “ernstig onderbeman is en 'n ernstige bedreiging vir lugvaartveiligheid inhou”. AGTERGROND Die drie passasiers was mnr. Alfred John Ward (24), 'n paramedikus, mnr. Gabriel (Gawie) le Roux (80), die Suid-Afrikaanse pasiënt vir wie die ambulansvlug vanaf Windhoek via Oranjemund na Kaapstad gereël is, en Le Roux se dogter, me. Charmaine Koortzen (49). Die vlieëniers en Ward het op 15 Augustus 2015 om 23:15 van Eros-lughawe in die hoofstad af opgestyg. Op Oranjemund het hulle die volgende dag omstreeks 02:16 met die pasiënt en sy dogter vertrek, maar tussen 04:29 en 05:44 het die vliegtuig in gure weer teen 'n heuwel op die wynlandgoed Maastricht buite Durbanville neergestort nadat dit deur Kaapstad Internasionale Lughawe goedkeuring ontvang het om te land.Westair Aviation het gesê hulle kan in dié stadium nie kommentaar lewer nie, maar hul regsverteenwoordigers hanteer die saak.Mnr. Borris Erasmus van PD Theron en Vennote en adv. Theo Barnard van Kaapstad is die eisers se regsverteenwoordigers.

Kaap-rampvlieëniers se familie eis miljoene

Kommentaar

Republikein 2026-05-06

Meld asseblief aan om kommentaar te lewer

Kaap-rampvlieëniers se familie eis miljoene

Kommentaar

Republikein 2026-05-06

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.