Juniors meet hulle in RSA – en presteer

Andrew Poolman – Altesame vyf Namibiese junior bergfietsryers het met medaljes teruggekeer ná hul mededinging in die SA Bekerreeks se onlangse byeenkoms nommer 4 by Hartbeespoort in die Noordwes-provinsie.

Danksy Rock & Rut bergfietsklub en die Namibiese Fietsryfederasie (NCF) se ontwikkelingsfonds het 'n groep van elf belowende juniors die geleentheid bygewoon.

Hierdie reeks byeenkomste is die sport se hoogste vlak van kompetisie in Suid-Afrika. Altesame vyf lande van Suider-Afrika het mededingers ingeskryf.

Hans du Toit, die nasionale fietsry-afrigter, sê die nuwe baan by Hartbeespoort was nog redelik grof en onafgewerk en het gevolglik meer tegniese eise as gewoonlik gestel.

“Daar was net een baan, so al die jong ryers in die onder 14 seuns en meisies wat gewoonlik nie die heel tegniese gedeeltes ry nie, moes ook die volle baan ry. Op elke baanrondte van 'n kort 3,6 km was die totale klimdele 'n massiewe 170 meter.

“Namibië is daaraan gewoond om goed te kompeteer, selfs met ons baie klein bevolking. Ondanks die terugslae van twee groot valle, twee pap wiele en een ketting wat gebreek het, was die resultate uitstekend.

“Onthou ook dat ons ryers almal in die agterste groep moes wegspring omdat hulle geen ranglyspunte van die vorige byeenkomste het nie.”

MEISIES onder 14: Delsia Janse van Vuuren het 'n derde plek behaal. Mari Thiel was vyfde, nadat sy 'n halwe rondte moet hardloop met 'n pap wiel oor die moordende roete.

SEUNS onder 14: Ongelukkig het Roger Surén se fietsketting tydens die wegspring gebreek en hy kon nie die wedren voltooi nie. Marco Thiel en Sean Lowe het 'n baie goeie vierde en vyfde plek gery in 'n baie kompeterende ouderdomsgroep. Franco Thiel het ook die moordende wedren voltooi.

SEUNS o.16: Namibië het die ondersteuners aan die gons gehad. Beide Daniel Hahn en Kevin Lowe het los onder die res uitgejaag en het hul naaste teenstander met meer as drie minute verpletter.

“Daniel het uitstekend die voortou geneem en rondte vir rondte uitstekende tye opgestel. Beide ons o.16's het 'n vinniger as die o.18-wentyd oor dieselfde afstand klaargemaak,” sê Du Toit.

Benewens Hahn (eerste) en Lowe (tweede) het Adrian Key ook goed gevaar ná sy wegspring van agter en het tiende klaargemaak

MEISIES o.18: Monique du Plessis het haar onlangse uitstekende vertonings voortgesit en het tweede geëindig ná die wenner van Suid-Afrika, Andrea Shoffman.

SEUNS o.18: Bergran Jensen was hier die enigste Namibiër en het ná 'n goeie wegspring die voortou geneem. Hy het ongelukkig 'n harde val beleef wat hom tot posisie 10 laat terugsak het.

Jensen het nietemin teruggeveg en het die derde plek met net 15 sekondes misgeloop. “Sy vierde posisie is steeds 'n goeie prestasie, veral omdat dit op dié baan baie moeilik was om ander ryers verby te steek,” sê Du Toit.

Twee van die junior groep se ondersteuners het ook in die ouer klasse gery, naamlik Stefan Bohlke (tweede in meestersklas) en Hans du Toit (derde in veteraanafdeling).


FOTO’s (verskaf)
Die o.16-wenner Daniel Hahn (middel) en sy landgenoot Kevin Lowe (links) het meer as drie minute voor die res van die seuns uitgejaag.

Monique du Plessis (links) op die podium met haar silwermedalje vir die meisies o.18-resies.

Die spannetjie Namibiërs poseer saam by Hartbeespoort.