Junior sjefs kan nou inskryf vir ACC

Namibië sal op 2 Oktober 2015 die gasheerland vir die derde Afrika Kookkunstoernooi (African Culinary Cup of ACC) wees wat by die Politegnikum van Namibië se hotelskool aangebied word.
Jong sjefs tussen die ouderdom van 18 en 25 jaar het tot 6 Augustus geleentheid om in te skryf en moontlik deel van die Namibiese span te word.
Die ACC is in 2012 deur die Suid-Afrikaanse Sjefsvereniging (Saca) begin en die kompetisie vir Afrika en die Midde-Ooste word deur die Wêreldvereniging van Sjefsverenigings (Wacs) onderskryf. Die kompetisie is ? geleentheid vir jong sjefs om amptelik by die Namibiese Sjefsvereniging (NCA) se nasionale juniorspan aan te sluit.
Belangstellendes wat deel van die Namibiese span wil wees, moet ? resep indien vir ? voor-, hoof- en nagereg, tesame met ? foto van die geregte wat hulle voorberei het. Beoordelaars van die NCA sal dan op vyf finaliste vir elk van die drie geregte besluit.
Hierdie finaliste sal op 13 Augustus by die Politegnikum vir ? plek in die span meeding en elk ? houer vol produkte ontvang waaruit hulle ? maaltyd moet voorberei. Daarna sal twee sjefs vir die voor- en hoofgereg en een sjef vir die nagereg gekies word om deel van die Namibiese span te vorm.
Die drie wat vir die span gekies word, sal gedurende Augustus en September beskikbaar vir oefensessies moet wees. Vir meer inligting, kontak Barbara Huber-Schenck by die NCA ([email protected] of 061 253 542).