Jürgen-Leigh slaan nóg ’n Elite Koei-toekenning los

Die Limousin-koei, Sharon, van Jürgen-Leigh Human (16) van die plaas Otjimukandi, Gobabis, is pas aangewys as die Landbounavorsingsraad (LNR) se Nasionale Beste Limousin Elite Koei in Suider-Afrika. Hy het die toekenning Vrydag tydens die Jakaranda Landbouskou in Pretoria in ontvangs gaan neem. Dit is tydens die LNR se Nasionale Vleisbeespresteerders-toekenningsgeleentheid wat deur die landboutydskrif Farmers’ Weekly geborg word, aan hom oorhandig. Sharon volg in die voetspore van Jürgen-Leigh se koei, Tracey, wat die 2015-wenner van dieselfde toekenning was.Dié jongman is baie beskeie oor die groot prestasie.Om so ’n uitsonderlike prestasie te behaal en te herhaal onder die uiterste droogtetoestand in Namibië, is nie maklik nie. “Dit verg geloof in jou Skepper, fyn beplanning en bestuur van jou koeikudde om sulke topmoederlyne daar te stel,” sê sy pa, dr. Hannes Human. “Ons beleid van ‘rugryers wat nie elke jaar kalf nie, hoort in die slagplaas’, werp ook vrugte af,” sê hy. Volgens Jürgen-Leigh loop daar drie bulkawers van Sharon op kommersiële plase in die land rond wat haar genetika versprei. “Twee ander word in my pa se kommersiële beeskuddes gebruik, terwyl ’n luiperd die sesde een gevang het. Al haar dogters is nog in die kudde en dra ma se gene sterk oor. Ek moet darem bysê, my oupa Hantie het haar as jong, eenjarige versie in Suid-Afrika op ’n finale uitverkoping gekoop en sy oog vir goeie genetika is vir my baie werd.”Jürgen-Leigh is baie bekommerd oor die huidige boerdery-omstandighede waar Namibiese speenkalwers nie die Suid-Afrikaanse grense mag oorsteek nie. “Dit gaan ’n besliste nadelige invloed uitoefen op ons bulverkope, asook vir ons ras omdat die speenkalfboer wat baie lief is vir die Limousin om ’n hoë gehalte speenkalf met ’n baie goeie bouvorm daar te stel, nou skielik voor ’n situasie gestel gaan word waar hy osse moet begin grootmaak en meer na die Bos Indicus-rasse gaan begin kyk."Hy sê die nadelige finansiële invloed wat die grenssluiting op die boere van Namibië het, rig groot skade aan. Dit het in ’n rimpeleffek ontaard en plattelandse ondernemings trek swaar. “Ek weet nie wat maak boere in die kommunale gebiede nie, want hulle is uitsluitlik speenkalfproduseerders.”Sharon is uit ongeveer 8 000 vroulike diere as beste elite koei gekies op grond van haar uitsonderlike prestasiesyfers, veral reproduksie. Benewens reproduksie moes sy ook ’n uitstaande rekord hê rakende die groei van haar nageslag. Aspekte wat oorweeg word, sluit in ouderdom met eerste kalf, tussenkalfperiode (TKP), datum van laaste kalwing, volledigheid van haar nageslag se speenrekords en fisieke gewigte, asook teelwaardes soos direkte geboorte- en speenwaardes. Volledige rekordhouding speel ook ’n belangrike rol in hierdie seleksieproses, vertel hy.Die Limousin Beestelersgenootskap van Suid-Afrika, waar Jürgen-Leigh se diere geregistreer is, is ook nie min trots op hierdie jong teler se prestasie nie. ’n Artikel onder die opskrif “Jong Namibiese Limousin-teler blink uit”, word in hul 2016 Limousin Joernaal aan hom afgestaan.Omdat hy nog skoolgaan, aan die Windhoek Afrikaanse Privaatskool, is boerdery ’n naweek- en vakansie-aangeleentheid. Tydens die wintersportseisoen het dit maar gesukkel om by die boerdery uit te kom, sê hy. Gelukkig darem vir moderne tegnologie. Benewens boerdery, het hy vanjaar weer sy kant vir Namibië op die sportveld gebring toe hy vir die o.17 nasionale atletiekspan gekies is.DATA VAN DIE KOEITat-nommer/Naam: MR 00.28 (Sharon)Geboortedatum:15 September 2000Ouderdom met eerste kalf (OEK): 32 maandeTussenkalfperiode (TKP): 356 daeGetal kalwers: 14 (6 bulkalwers en 8 verse) en dragtig met nommer vyftienBLUP-SYFERS200 dae: +19400 dae : +24600 dae : +32Gewig as volwasse koei: +44Melk: +5Karkas: +23

Jürgen-Leigh slaan nóg ’n Elite Koei-toekenning los

Kommentaar

Republikein 2025-11-04

Meld asseblief aan om kommentaar te lewer

Jürgen-Leigh slaan nóg ’n Elite Koei-toekenning los

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.