Jou integriteit moenie in twyfel getrek kan word nie

Volwassenes is net soos kinders. As hulle ’n kans kan vat, hoekom nie? Ek preek altyd vir my kinders oor integriteit. Dan wil hulle altyd weet wat dit beteken. Ek begin nou dink my verduideliking is nie 100% reg nie, maar ek glo integriteit beteken dat jy steeds die regte ding sal doen, al kyk niemand vir jou nie.
Jy moet ’n gewete hê. ’n Voorbeeld is as jy in jou motor ry en ’n weggooibare koffiebeker in jou hand het. Gaan jy die koffiebeker hou om later weg te gooi, of gooi jy dit by die venster uit?
Of wanneer jy by die strand is, wat doen jy met jou vullis? As iemand vir jou kyk, neem jy dit saam en as jy alleen is, los jy dit net daar?
Dieselfde in die besigheidswêreld; gaan jy geld steel net omdat niemand jou sien nie, of gaan jy die regte ding doen en die mense aangee wat steel? Of join jy hulle maar net; dit is mos die maklike uitweg.
In die politieke domein geld dieselfde beginsel. Politici dink party keer hulle is verhewe bo die wet, maar dit is waar integriteit inkom. Om in enige hoë posisie aangestel te word, moet jy beslis eerlik en eerbaar wees. Niemand gaan oor jou skouer loer en jou op die straight en narrow hou nie. Jy moet dit self doen.
Die Handwoordeboek van die Afrikaanse Taal omskryf integriteit as eerlikheid, onomkoopbaarheid en regskapenheid. Ek dink vele mense, selfs “volwassenes”, moet nog leer wat die woord rêrig beteken.
Talle ander eienskappe in die lewe is natuurlik belangrik, soos om empatie en simpatie met ander mense te hê, verdraagsaamheid, deursigtigheid, verantwoordelikheidsin en verantwoordbaarheid. Al hierdie eienskappe vleg inmekaar in.
Om dié eienskappe te hê en na te streef, kan jou net ’n beter mens maak. Ek kan nie verstaan as iemand nie empatie of ten minste simpatie met iemand kan toon nie. Of nie die regte ding wil doen nie.
Ek sê nie ek is ’n engeltjie nie, maar ek weet nie hoe slaap die bedrieërs, die moordenaars en geweldenaars in die aande nie. Hoe slaap jy as jy weet jy het mense se swaarverdiende geld gesteel net omdat jy geldgierig is? Of as jy iemand doodgemaak het net omdat jy jaloers was.
Integriteit is ’n denkwyse en net jyself kan die besluit neem om dit na te volg – net soos ’n dieet.
’n Wyse man het eendag opgemerk: Dit is maklik om waar te neem of iemand anders integriteit het of nie. En tog dink niemand ooit dat jyself dalk ’n probleem met “integriteit” het nie.