Jooste: Gaomab moet as Fishcor-voorsitter bedank

Ronelle Rademeyer – Een terugslag ná die ander tref Fishcor en die regrukplan waaroor die voorsitter, mnr. Mihe Gaomab II, joernaliste sowat ses weke gelede in Windhoek toegespreek het, is aan die wankel.Dié vismaatskappy van die staat is nie net tans sonder 'n uitvoerende bestuur nie, maar gaan ook sy voorsitter verloor.Mnr. Leon Jooste, minister van staatsondernemings (SOE's), het gister by navraag gesê Gaomab II se onlangse aanstelling as hoof uitvoerende beampte van die Namibië Nywerheidsontwikkelingsagentskap (Nida) raak sy posisie in die rade van twee ander SOE's. Dit is naamlik sy voorsitterskap van Fishcor en sy posisie as raadslid van die Regulerende Owerheid vir Kommunikasie in Namibia (Cran).“Ons (die ministerie) gaan hom vra om te bedank,” het Jooste in 'n whatsapp gesê.Fishcor is tans onder bestuur van 'n tydelike toesighouer, die direksielid me. Ruth Herunga, nadat die topbestuurslede een na die ander bedank het.Intussen adverteer die vismaatskappy sy toegedeelde 5 000 ton kwota vir stokvis wat aan boord gevries en nie aanlandig verwerk word nie.Gaomab sê Fishcor hoop om sowat N$60 miljoen met die verkoop van dié kwota te verdien. Dit beteken hy hoop om minstens N$12 000 per ton te kry.Hy sê dié geld is geoormerk om bedryfsuitgawes te dek.“Ons beoog om minstens N$60 miljoen uit die 5 000 ton stokviskwota teen N$12 000 per ton in te samel. Die inkomste sal vir onmiddellike en dringende finansiële en bedryfsbehoeftes aangewend word,” het hy gesê.Dit is die tweede keer vanjaar dat Fishcor 'n kwota verkoop om sy deure oop te hou.Fishcor het vroeër vanjaar sowat 3 000 van die 9 000 ton kwota vir stokvis wat deur die ministerie van visserye en mariene hulpbronne aan hom toegeken is, vir N$12 700 per ton verkoop het om uit sy geldelike verknorsing te kom. Dit het aan die vismaatskappy 'n inkomste van N$39 miljoen besorg, het Gaomab ses weke gelede op 'n nuuskonferensie aan joernaliste gesê.Hy het aan ons susterkoerant Namibian Sun gesê die Sentrum vir Finansiële Intelligensie (FIC) het Fishcor se gevriesde bankrekening vroeg in April weer geaktiveer. Die sluiting van die rekening was weens Fishcor se beweerde oortreding van valutabeheerregulasies.Dié vismaatskappy was die episentrum van die storm wat losgebars het toe die Fishrot-skandaal in November 2019 oopgevlek is.Gaomab wou vroeër nie nader besonderhede verstrek oor die ondersoek waarmee die FIC en die Teenkorrupsiekommissie (ACC) besig is nie. Hy het wel gesê dit is belangrik dat Herunga as tussentydse toesighouer die leisels oorneem, aangesien dit nodig is om dié twee agentskappe van inligting te voorsien.Volgens hom word goeie vordering gemaak met die aanstelling van 'n nuwe uitvoerende hoofbeampte by Fishcor in die plek van mnr. Mike Nghipunya, wat in aanhouding is op klagte wat met die Fishrot-skandaal verband hou. – ronelle@republikein.com.naFOTOFishcor se vissersboot, die MVF Monte San Roque, in die hawe van Lüderitz. Foto Nampa

Jooste: Gaomab moet as Fishcor-voorsitter bedank

Kommentaar

Republikein 2026-05-05

Meld asseblief aan om kommentaar te lewer

Jooste: Gaomab moet as Fishcor-voorsitter bedank

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.