Jong vrou leef haar droom
Sussana Immanuel werk in ’n manswêreld, en wil jong meisies aanmoedig om hul drome te volg en hulle nie aan negatiewe kommentaar te steur nie.
Tanja Bause – “Die geluid wat ’n voertuigenjin maak wanneer jy die sleutel draai nadat jy die enjin uitmekaar gehaal en weer aanmekaargebou het, is die beste geluid in die wêreld,” sê Sussana Immanuel (26), ’n motorwerktuigkundige in Windhoek.
Sy is op Oskikuku in die noorde van die land gebore. Sy het daar grootgeword en graad 12 op Okahao voltooi. Daarna het sy motor-meganiese ingenieurswese by die Windhoek Beroepsopleidingsentrum (WVTC) gaan studeer.
“Ek wou graag motor-elektriese ingenieurswese gaan studeer, maar hulle bied nie dié kursus aan nie en dus het ek die meganiese kursus begin.”
Volgens Sussana het haar pa, Immanuel Andreas, wat in die konstruksiebedryf gewerk het, haar van kleintyd af aangemoedig om met haar hande te werk.
“Hy het altyd gesê: ‘Kyk dat jy met jou hande kan werk’. Hy glo wanneer hy die dag nie meer daar is nie kan ek dinge vir myself doen. Ek kan my eie besigheid begin en sal altyd werk hê. Ek het nog altyd van voertuie gehou. Wanneer jy ’n enjin uitmekaar haal en weer aanmekaarbou, wanneer jy die fout gevind en herstel het, is ’n ongelooflike gevoel. Om ’n ratkas uitmekaar te haal is natuurlik my gunsteling, ek is gek oor ratkaste. Wanneer jy die sleutel draai en die motor luier, is dit die beste geluid in die wêreld.”
Ongeveer 150 studente het die kursus by die WVTC gevolg waarvan slegs drie vroue was.
“In die begin was dit nie maklik nie. Die seuns het gevra of ek ’n band kan omruil? Of hoekom wil ek met vuil hande rondloop en soos ’n man lyk? Ek het net altyd gesê dat ek in die Noorde grootgeword het en al van kleintyd af swaar goed optel en ronddra. Ek is sterk en kan enigiets doen wat hulle kan doen. En my hande kan ek gereeld was,” het sy gesê.
Sussana het haar nie laat afskrik nie en het die kursus in 2018 voltooi.
“Ek het egter nie gegradueer nie, omdat ek nie genoeg geld gehad het nie en ’n werk moes soek. Dit beteken nie ek is klaar geleer nie; ek sal nog gradueer.”
Sy het vir lank werk gesoek en is elke keer weggewys. Sy het in Julie 2020 vir ’n pos by Lee Tec Truck & Trailer in Windhoek aansoek gedoen.
“Ek is die Vrydag vir ’n onderhoud ingeroep. Ek het vir mnr. Stephen (Stephen Lee) gesê ek wil nie geld hê nie, ek wil net werk en ondervinding opdoen. Hy het my dieselfde dag teruggeskakel en gesê ek moet Maandag begin. Ek is nie vir ’n oomblik spyt nie en natuurlik kry ek ’n salaris en ek doen baie ondervinding op. Ek het selfs al op ’n vragmotor gewerk. Dit is opwindend en ek leer elke dag.”
Volgens haar ondervind sy geen probleme met haar manlike kollegas nie. Inteendeel vra hulle haar soms om hulle te help.
“My hande is baie kleiner as die van ’n man. Dit beteken ek kom makliker by sommige plekke in die enjin uit. Dus roep hulle my en ek help gou. Volgende keer as ek hulp benodig, help hulle my. Die wat dalk skepties aan die begin was se opinie het verander. Ek is deel van die span en niemand twyfel meer in my vermoëns nie.”
Raad
“Ek wil elke jong meisie aanmoedig om hul drome te volg en hulle nie aan negatiewe kommentaar te steur nie. Wanneer mense sê vroue kan nie enjins uitmekaar haal nie, bly stil en werk, leer en doen jou bes, dan kan jy hulle later uitdaag en wys dat jy net so goed soos hulle is. Volg jou passie en moet nooit moedeloos raak nie. Moet nie vir ander mense luister nie. Jy is besig om ’n lewensbestaan vir jouself te maak en eendag kan jy vir jou kinders kos op die tafel sit.”
Haar droom is om verder te gaan studeer en eendag ’n instrukteur by die WVTC te word.
“Ek dink as meisies sien daar is ’n vroulike instrukteur wat die kursus aanbied, sal hulle dalk meer belang stel en hulle dalk aanspoor om hul passie te volg. Ek kan hulle wys dat hulle nie net in ’n kantoor agter ’n rekenaar hoef te sit nie. Hulle kan enigiets doen en ek praat nie net van motorwerktuigkundige nie; hulle kan skrynwerkers of ketelmakers word.”
Werkgewer
“Ons is baie trots op Sussana, sy staan vir niks en niemand terug nie. Die mans wat dalk bietjie skepties in die begin was, het vinnig besef wanneer sy ’n moersleutel optel sy net so goed soos hulle is. Inteendeel sy werk harder omdat sy ’n vrou is en haarself gedurig moet bewys. Al ons werkers behandel mekaar met gelykheid, regverdigheid en respek,” het Monika Witulski van Lee Tec Truck & Trailer gesê.
Stephen het jong meisies en vroue wat in die beroep belang stel, aangemoedig om hom te nader.
“Ek het geen probleem om nog vroue op te lei. Kom gesels met my,” het hy gesê.
Sy is op Oskikuku in die noorde van die land gebore. Sy het daar grootgeword en graad 12 op Okahao voltooi. Daarna het sy motor-meganiese ingenieurswese by die Windhoek Beroepsopleidingsentrum (WVTC) gaan studeer.
“Ek wou graag motor-elektriese ingenieurswese gaan studeer, maar hulle bied nie dié kursus aan nie en dus het ek die meganiese kursus begin.”
Volgens Sussana het haar pa, Immanuel Andreas, wat in die konstruksiebedryf gewerk het, haar van kleintyd af aangemoedig om met haar hande te werk.
“Hy het altyd gesê: ‘Kyk dat jy met jou hande kan werk’. Hy glo wanneer hy die dag nie meer daar is nie kan ek dinge vir myself doen. Ek kan my eie besigheid begin en sal altyd werk hê. Ek het nog altyd van voertuie gehou. Wanneer jy ’n enjin uitmekaar haal en weer aanmekaarbou, wanneer jy die fout gevind en herstel het, is ’n ongelooflike gevoel. Om ’n ratkas uitmekaar te haal is natuurlik my gunsteling, ek is gek oor ratkaste. Wanneer jy die sleutel draai en die motor luier, is dit die beste geluid in die wêreld.”
Ongeveer 150 studente het die kursus by die WVTC gevolg waarvan slegs drie vroue was.
“In die begin was dit nie maklik nie. Die seuns het gevra of ek ’n band kan omruil? Of hoekom wil ek met vuil hande rondloop en soos ’n man lyk? Ek het net altyd gesê dat ek in die Noorde grootgeword het en al van kleintyd af swaar goed optel en ronddra. Ek is sterk en kan enigiets doen wat hulle kan doen. En my hande kan ek gereeld was,” het sy gesê.
Sussana het haar nie laat afskrik nie en het die kursus in 2018 voltooi.
“Ek het egter nie gegradueer nie, omdat ek nie genoeg geld gehad het nie en ’n werk moes soek. Dit beteken nie ek is klaar geleer nie; ek sal nog gradueer.”
Sy het vir lank werk gesoek en is elke keer weggewys. Sy het in Julie 2020 vir ’n pos by Lee Tec Truck & Trailer in Windhoek aansoek gedoen.
“Ek is die Vrydag vir ’n onderhoud ingeroep. Ek het vir mnr. Stephen (Stephen Lee) gesê ek wil nie geld hê nie, ek wil net werk en ondervinding opdoen. Hy het my dieselfde dag teruggeskakel en gesê ek moet Maandag begin. Ek is nie vir ’n oomblik spyt nie en natuurlik kry ek ’n salaris en ek doen baie ondervinding op. Ek het selfs al op ’n vragmotor gewerk. Dit is opwindend en ek leer elke dag.”
Volgens haar ondervind sy geen probleme met haar manlike kollegas nie. Inteendeel vra hulle haar soms om hulle te help.
“My hande is baie kleiner as die van ’n man. Dit beteken ek kom makliker by sommige plekke in die enjin uit. Dus roep hulle my en ek help gou. Volgende keer as ek hulp benodig, help hulle my. Die wat dalk skepties aan die begin was se opinie het verander. Ek is deel van die span en niemand twyfel meer in my vermoëns nie.”
Raad
“Ek wil elke jong meisie aanmoedig om hul drome te volg en hulle nie aan negatiewe kommentaar te steur nie. Wanneer mense sê vroue kan nie enjins uitmekaar haal nie, bly stil en werk, leer en doen jou bes, dan kan jy hulle later uitdaag en wys dat jy net so goed soos hulle is. Volg jou passie en moet nooit moedeloos raak nie. Moet nie vir ander mense luister nie. Jy is besig om ’n lewensbestaan vir jouself te maak en eendag kan jy vir jou kinders kos op die tafel sit.”
Haar droom is om verder te gaan studeer en eendag ’n instrukteur by die WVTC te word.
“Ek dink as meisies sien daar is ’n vroulike instrukteur wat die kursus aanbied, sal hulle dalk meer belang stel en hulle dalk aanspoor om hul passie te volg. Ek kan hulle wys dat hulle nie net in ’n kantoor agter ’n rekenaar hoef te sit nie. Hulle kan enigiets doen en ek praat nie net van motorwerktuigkundige nie; hulle kan skrynwerkers of ketelmakers word.”
Werkgewer
“Ons is baie trots op Sussana, sy staan vir niks en niemand terug nie. Die mans wat dalk bietjie skepties in die begin was, het vinnig besef wanneer sy ’n moersleutel optel sy net so goed soos hulle is. Inteendeel sy werk harder omdat sy ’n vrou is en haarself gedurig moet bewys. Al ons werkers behandel mekaar met gelykheid, regverdigheid en respek,” het Monika Witulski van Lee Tec Truck & Trailer gesê.
Stephen het jong meisies en vroue wat in die beroep belang stel, aangemoedig om hom te nader.
“Ek het geen probleem om nog vroue op te lei. Kom gesels met my,” het hy gesê.
Kommentaar
Republikein
Geen kommentaar is op hierdie artikel gelaat nie