Jong gemeenskapsheld tydens pandemie gevorm

Iréne-Mari van der Walt – Die wenner van Metro en Future Media se kompetisie om gemeenskapshelde te vereer, sê haar volgende droom is om 'n kinderhuis te stig. Die 20-jarige Martha Festus het N$30 000 losgeslaan met haar ywer om die Havana-gemeenskap buite Windhoek vanuit haar sopkombuis te voed.“Ek voel gelukkig en geseënd; ek het dié prys regtig nie verwag nie,” sê Festus. Net soos die sopkombuis, is haar droom om 'n kinderhuis te stig gebore uit die nood wat sy in haar buurt raakgesien het. Sy het haar sopkombuis, wat later as die papstoor bekend sou staan, gedurende Covid-19 op die been gebring. “Ek het die sopkombuis aan die begin van die pandemie gestig. Ek het self in Havana grootgeword en ek het baie kinders van gebroke gesinne gesien en ek het besef daar is baie kinders wat met leë mae gaan slaap. Daarom het ek besluit om iets te doen met dit wat ek het,” sê sy. 'n Jaar later voed sy elke Saterdag ongeveer 300 kinders van haar omgewing voor die Laerskool Havana. Sy sê die mense wat sy by haar sopkombuis teëkom, hou haar passie aan die brand. “Ek leer elke dag iets nuut by hulle en nuwe persoonlikhede kom elke keer op my pad. Ek geniet dit om ander gelukkig te maak,” sê sy. Festus sê die nood by die sopkombuis is voortdurend, maar sy moedig diegene wat nie finansieel kan bydra nie aan om hul tyd af te staan.“Daar is hoofsaaklik hande nodig. Dis nie maklik om almal op jou eie te help nie, maar skenkings is altyd welkom,” sê sy. Lisias Uusiku, die Metro Supermarket se koördineerder vir sosiale media, sê die kompetisie is van stapel gestuur juis om plaaslike liefdadigheidswerkers soos Festus in die kollig te plaas. “Ons probeer erkenning gee aan mense wat misgekyk word. Ons het gesoek na mense wat vir andere goed doen sonder om iets terug te verwag. In hierdie tyd waarin die wêreld so onderstebo is, is mense wat hoop en moed bring baie belangrik,” sê hy. Hy glo die reusesukses van Metro se eerste kompetisie vir gemeenskapshelde wys dat dit weer gehou behoort te word. “Ek dink beslis ons sal dit jaarliks aanbied vir so lank soos ons kan,” sê hy. Festus het wel met N$30 000 weggestap, maar sy is nie die enigste held wat vereer is nie. Julia Heita, die stigter van Keep the Girl in School Namibia het met die tweede prys van N$15 000 weggestap en Korneliu Paulus, die stigter van die Kwafela Oshiwana-stigting, het die derde prys van N$10 000 losgeslaan.

Jong gemeenskapsheld tydens pandemie gevorm

Kommentaar

Republikein 2025-05-28

Meld asseblief aan om kommentaar te lewer

Jong gemeenskapsheld tydens pandemie gevorm

Kommentaar

Republikein 2025-05-28

Meld asseblief aan om kommentaar te lewer

MELD AAN

Advertensie