Jong Garbers word land se eerste Red Bull BMX-ryer

Die 22-jarige Namibiese BMX-ryer Eric Garbers het 'n groot verrassing gekry toe die Oostenrykse Red Bull BMX-ryer Senad Grosic vir hom 'n videoboodskap gestuur het.In die boodskap het Grosic hom ingelig dat hy die wenner is van die 2015 “Under My Wings” slypskool wat die Oostenryker in Windhoek aangebied het. Grosic het destyds 'n klompie Namibiese kinders geleer hoe om die hellings vir spronge te bou, asook om truuks en tolbewegings uit te voer.Grosic het oor die laaste jaar of wat die jong Garbers se vordering gemonitor en sê: “Eric is een van die beste ontluikende talente in BMX-ry wat ek nog gesien het. Sy vaardighede en truuks op 'n BMX het oor die laaste jaar so baie verbeter. Hy het 'n goeie kans om op internasionale vlak deur te breek.”As deel van Garbers se prys het die Red Bull-span in Namibië die reëlings getref dat hy twee naweke gelede 'n fotosessie in Kaapstad saam met sy held Senad Grosic kon hê.Met goedkeuring van Red Bull se internasionale sportafdeling, het Grosic tydens die ontmoeting die kenmerkende rooi Red Bull-valhelm aan Garbers oorhandig en ook die nuus oorgedra dat Garbers nou die eerste Namibiese Red Bull-ryer in die geskiedenis is.Nadja Geiger, die bestuurder van Red Bull se handelsmerk in Namibië, het Garbers van harte geluk gewens met die prestasie.“Jy het aan ons gewys dat drome inderdaad waar kan word, indien 'n mens aanhou hard werk daaraan. Die Red Bull span is baie trots op jou. Gaan wys aan die wêreld watter talent in Namibië versteek lê. Ons kan nie wag om meer van jou te sien nie.”Garbers, 'n oudskolier van Windhoek Afrikaanse Privaatskool en tans 'n student van die Namibiese Universiteit van Wetenskap en Tegnologie (NUST), sê: “BMX-ry is my passie en my lewe. Ek sal nietemin die regte ding doen en my studies in stadsbeplanning voltooi.”Garbers sal Namibië glo in komende internasionale BMX kompetisies verteenwoordig.

Jong Garbers word land se eerste Red Bull BMX-ryer

Kommentaar

Republikein 2025-06-26

Meld asseblief aan om kommentaar te lewer

Jong Garbers word land se eerste Red Bull BMX-ryer

Kommentaar

Republikein 2025-06-26

Meld asseblief aan om kommentaar te lewer

MELD AAN

Advertensie