Jeugraad vra studiegeld

Augetto Graig - Die uitvoerende hoof van die Nasionale Jeugraad (NYC), mnr. Mandela Kapere, het vir 'n nuwe benadering tot die finansiering van minderbevoorregte hoër onderwysstudente gevra. Hy sê daar is geweldige druk op die Nasionale Hulpfonds vir Studente (NSFAF) en hulle kan nie voorbly nie. Volgens die jeugleier is daar honderde Namibiërs wat akademiese toegang tot hoër onderwys verdien, maar wat weens armoede uitgesluit sal bly, met geen geleentheid om hul drome 'n werklikheid te maak nie. Kapere sê die finansieringsmodel wat tans gebruik word, moet hersien word. “Hoewel beurse en lenings toegeken word, kan studente wat dit verdien, nie betekenisvol bygestaan word nie. Soms maak die vereistes om vir finansiering te kwalifiseer, dit vir arm studente onmoontlik om verder te studeer,” sê hy. “Ons moet dus spoedig 'n finansieringsmodel vir hoër onderwys ontwikkel wat doeltreffend en volhoubaar is en wat die uitdagings van minderbevoorregte studente sal verlig,” sê hy.Kapere het gevra die private sektor moet meer betrokke by die finansiering van studente raak. Hy stel 'n finansieringsmodel voor wat die openbare vennootskapsbenadering volg, soos voorgestel in die nuutste Nasionale Opvoedkundige Konferensie (2011), met bydraes van die regering én die private sektor. “So 'n finansieringsmodel sal nie net aan die Universiteit van Namibië (Unam) se vereiste 50%-deposito voldoen nie, maar sal ook akademies verdienstelike, maar minderbevoorregte studente se struikelblokke verwyder,” sê Kapere.Hy het die NSFAF se uitdagings toegeskryf aan die groot aantal voormalige begunstigdes wat nie hul lenings terugbetaal nie, en sê ander voornemende studente ly hieronder. Kapere het ook president Hage Geingob se beskikbaarmaking van N$150 miljoen verwelkom om die NSFAF se skulde tydelik te delg.

Jeugraad vra studiegeld

Kommentaar

Republikein 2025-05-06

Meld asseblief aan om kommentaar te lewer

Jeugraad vra studiegeld

Kommentaar

Republikein 2025-05-06

Meld asseblief aan om kommentaar te lewer

MELD AAN

Advertensie