Jeug leer meer oor omgewing

’n Gespesialiseerde biodiversiteitsprogram waarmee leerlinge van Tsumeb oor bome en plante, veral beskermde spesies, ingelig is, is ter herdenking van Wêreldhabitatdag deur Dundee Precious Metals op die dorp gehou. Die program het die vorm van ’n uitdaging aangeneem wat die identifisering van bome behels het. Dit was op graad 11- en graad 12- leerlinge van die hoërskole en die plaaslike Padvinders gemik wat ’n oriënteringsessie asook ’n daglange veldoefening bygewoon het. Die buitemuurse aktiwiteit het gefokus op die identifisering van bome wat rondom die smelter voorkom. Volgens Dundee was die doel van die geleentheid om jongmense te wys hoe om ’n “tweedelige sleutel” te gebruik. ’n Tweedelige sleutel is ’n hulpmiddel wat ’n persoon in staat stel om die items in sy natuurlike habitat te identifiseer.Sleutels bestaan uit ’n reeks keuses wat jou na die korrekte naam van die gegewe item lei en dit bied altyd twee keuses in elke stap.Die plaaslike plantkundige, me. Coleen Mannheimer, het die uitdaging hanteer. Op die eerste dag het Mannheimer die leerlinge aan Dundee se biodiversiteitsprogram bekend gestel en ’n sessie gelei oor die terminologie wat verband hou met die identifisering van bome. Daarna het sy hulle gewys hoe om ’n tweedelige sleutel te maak en te gebruik.Die studente het toe ’n vereenvoudigde weergawe van die sleutel op twee boomsoorte gebruik. Daarna het hulle ’n praktiese oefening gedoen en hul eie sleutels met behulp van foto’s gemaak. Op die tweede dag moes die leerlinge 15 verskillende boomspesies identifiseer met behulp van die tweedelige sleutel en ’n eksemplaar van A Field Guide to the Trees and Shrubs of Namibia. Die leerlinge moes ook ’n vraelys oor die verskillende boomspesies beantwoord en ’n verskeidenheid vrugte in die veld gaan versamel. Punte is onder meer toegeken vir die bou van die sleutel, die identifisering van bome in die veld, die gebruik van die sleutel, spelling, die netheid van die verslaggewing en die korrekte toepassing van die instruksies.Punte is ook toegeken vir die korrekte antwoorde op die vraelys en die opsporing van spesifieke items in die veld.Die omgewingsbestuurder by Dundee Precious Metals, mnr. Theo Uvanga, het gesê die leerlinge wat aan die aktiwiteit deelgeneem het, het ’n goeie indruk gemaak en dit was ’n plesier om saam met hulle te werk. Hy het gesê hulle het met geesdrif deelgeneem en hulself “met intelligensie, belangstelling en ywer aan die taak gewy” . “Hul standaard van werk was baie hoog en die uiteindelike punte het maar min verskil,” het Uvanga gesê. “Alle deelnemende skole en die Tsumeb Padvindersgroep kan trots wees op hul werk, hetsy hulle in die topdrie geëindig het of nie.”Mannheimer het gesê: “Die kinders het ’n beter begrip van die gebruik van die sleutels as sommige eerstejaarstudente.” Die Sekondêre Skool Etosha het die uitdaging gewen en daarmee saam ’n geskenkbewys vir skryfbehoeftes ter waarde van N$1 500 ontvang. In die tweede plek was die Tsumeb Padvindersgroep wat N$1 000 losgeslaan het, en die Sekondêre Skool Oshikoto in die derde plek, wat N$500 gewen het. Elke skool wat aan die uitdaging deelgeneem het, het ’n gratis eksemplaar van Indigenous Plant Products in Namibia ontvang. Dié boek is onlangs vrygestel en sal in skoolbiblioteke gebruik word. Volgens Uvanga sal die uitdaging ’n jaarlikse instelling word.

Jeug leer meer oor omgewing

Kommentaar

Republikein 2025-07-17

Meld asseblief aan om kommentaar te lewer

Jeug leer meer oor omgewing

Kommentaar

Republikein 2025-07-17

Meld asseblief aan om kommentaar te lewer

MELD AAN

Advertensie