Jessica wil vinnig op wêreldranglys klim

Andrew Poolman - Namibië se twee belowende jong vrouegholfspelers wat tans in Amerika studeer, is beide besig om opgang te maak.Jessica Dreesbeimdieke se naam was voor die naweek boaan die voorloperbord ná die eerste twee dae van die 88ste Florida Amateur Ope-toernooi.Meer as 150 spelers het die toernooi in St. Augustine (sowat 65 km suid van Jacksonville) aan die ooskus van Florida begin.Dreesbeimdieke het 66 en 70 houe aangeteken in die eerste twee rondes wat op verskillende bane gespeel is (King & Bear en daarna St. Johns). Dit was agt onder die baansyfer en drie houe beter as die volgende gesamentlike drietal.In 'n ietwat vreemde formaat is die eerste twee rondes van houespel daarna deur putjiespel opgevolg. Die top 32 spelers het mekaar dus begin uitskakel, met Dreesbeimdieke wat in haar eerste kragmeting die volle 18 putjies nodig gehad het om die aanslag van Antonia Poate af te weer en met 'n enkele putjie te wen.Die 20-jarige gebore Windhoeker het die volgende middag ook die ronde van 16 oorleef. Sy het Morgan Baxendale met 4 en 3 uitgeskakel om haar plek onder die finale agt in te neem.Die kwarteindronde is egter waar dit geëindig het, toe sy met 5 en 3 deur Ramya Meenakshisundaram geklop is. Dreesbeimdieke het dus in die gesamentlike vyfde posisie klaargemaak.Sy is die enigste Namibiër wie se naam op die amateur wêreldranglys verskyn en hierdie vertoning het haar 'n reusehupstoot met 74 plekke gegee. Sedert gister is sy in haar hoogste posisie nóg (694ste). Die enigste manier om 'n ranglysposisie te verbeter, is deur gereelde deelname aan toernooie waarin ook 'n gesonde getal hoër gerekende spelers deelneem. Die uiteindelike wenner van die Florida Amateur Ope, Shannon Aubert van Frankryk, is nou 87ste.Volgens Dreesbeimdieke se ma, Bianca Dodds, bestaan die moontlikheid dat haar dogter in Julie in die Sanlam Suid-Afrikaanse putjiespelkampioenskap in Kaapstad sal gaan meeding. “Ons gaan ook binne twee weke weer aan die Florida Vroue houespelkampioenskap meeding, waar ook heelwat sterk spelers behoort mee te ding.”Jessica studeer twee graadkursusse (sielkunde en maatskaplike regte) aan die Universiteit van Denver. Haar vordering op die wêreldranglys in die drie-en-'n-half jaar sedert die gesin na Amerika verhuis het, is dus merkwaardig.“Dit is maar net die begin en haar doelwit bly om eendag die wêreld van beroepsgholf aan te durf,” sê Bianca.'DALK FAMILIE VAN ERNIE?'Caro Els, voorheen van Swakopmund en nou 'n tweedejaarstudent in Noord-Michigan Universiteit se vrouespan, volg ook haar droom om haar gholftalent ten volle uit te leef.Haar afrigter Bob Bastian het haar in 'n koerantonderhoud geprys dat sy altyd “superpositief” is en sover alles gedoen het wat van haar verwag is.“Haar spel is baie bestendig en sy tref die bal goed. Dit sal vir haar baie goeie blootstelling wees teen van die beste spelers in die land en om te sien wat dit verg om op hierdie vlak te speel,” het Bastians voor haar deelname aan 'n toernooi by Sweetgrass gholfklub in Michigan komende naweek gesê.Caro (20), oudskolier van Pro-Ed Akademie, moes in die onderhoud verduidelik dat sy nie familie van een van die sport se grootste name, Suid-Afrika se Ernie Els, is nie en dat sy hom darem een keer ontmoet het.Caro het in Januarie in Amerika aangekom nadat sy met verskeie afrigters gekorrespondeer het en uiteindelik 'n goeie beursaanbod by Noord-Michigan gekry het.Haar studierigting is oefenkunde in atletiek, maar sy is op haar gelukkigste op die gholfbaan. Vandat sy op agtjarige leeftyd begin speel het, het gholf volgens haar nog nooit soos werk gevoel nie.Vir die komende toernooi by Sweetgrass, waar reënweer reeds sedert laas week sake op die baan bemoeilik, sê Els sy plaas nie onnodige druk op haarself met hoë verwagtinge nie.“Ek is opgewonde om myself te gaan geniet en die atmosfeer te beleef. Ek is bietjie op my senuwees, maar ook baie opgewonde.”

Jessica wil vinnig op wêreldranglys klim

Kommentaar

Republikein 2025-11-05

Meld asseblief aan om kommentaar te lewer

Jessica wil vinnig op wêreldranglys klim

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.