Jessica bou momentum in RSA se Sonskyn-toer
Gholf
Andrew Poolman
Die Namibiese professionele gholfspeler Jessica Dreesbeimdieke wil oor die volgende twee weke die lang reis vanaf die Amerikaanse staat Florida na Suid-Afrika laat tel, wanneer sy in twee toernooie van die Sonskyn-vrouetoer meeding.
Dreesbeimdieke begin speel môre in die Kaapstad Vroue Ope by die Royal Cape Town-gholfklub, in die aanloop tot volgende week Donderdag se Investec Suid-Afrikaanse Vroue Ope by die Westlake-gholfklub.
Die 22-jarige voormalige Windhoeker, wat laas jaar 'n BA-graad aan die Universiteit van Denver verwerf het, het laas week ook stewig gevaar in die SuperSport Ladies Challenge wat by die Wild Coast-buiteklub in KwaZulu-Natal gespeel is.
Teen 'n sterk veld van internasionale spelers was Dreesbeimdieke die algehele voorloper ná die eerste dag met 'n 4-onder-syfer 66. Winderige toestande het haar nie gekeer om vyf voëltjies te behaal op pad na 'n voorsprong van twee houe nie. Net by een putjie het sy 'n hou aan syfer afgestaan.
“Ek het baie goed begin, met voëltjies op die eerste twee putjies. Teen daai dwarswind het my voëltjie op putjie 17 (syfer 3) soos 'n volmaakte gelukhou gevoel. Ek het 40 meter regs van die pen gemik en die bal het net links van die putjie bly lê, vir 'n sethou van sewe meter vir die voëltjie.”
Op dag twee het sake egter minder vlot verloop met 'n ronde van 76 wat haar na die gesamentlike vierde posisie laat terugsak het, voordat sy op die finale dag 73 behaal het vir 'n gesamentlike agtste eindposisie (prysgeld R11 220).
Skotland se Jane Turner het die toernooi met 4-onder syfer 206 gewen (prysgeld R56 000), met Dreesbeimdieke op 215 houe.
“Die toernooi by Wild Coast Sun was vir my 'n goeie een. Ek was uiteraard teleurgesteld dat ek in die tweede ronde nie so goed gespeel het nie, maar ja, die wind het nogal sterker gewaai soos die dag gevorder het.
VSA-SEISOEN DIE GROTER DOEL
“In die geheel is ek steeds tevrede om in die top-10 te kon klaarmaak. Dit is maar net my tweede Sonskyn-toernooi en my eerste gholftoernooi sedert Oktober laas jaar,” sê sy.
Die vorige week het Dreesbeimdieke by die SA Vroue Meesters by San Lameer nie so blink gevaar nie, maar het nogtans die afsnypunt vir die laaste twee rondes gehaal.
“My hoofdoel vir die toernooie in Suid-Afrika is om van die afseisoen se roes af te skud en terug in kompeterende gholf te kom voordat die Amerikaanse seisoen volgende maand in erns begin.
“Om dus reeds in my tweede toernooi 'n voorloper te kon wees, was reeds 'n heerlike gevoel. Ek voel definitief dat ek my selfvertroue en momentum begin terugkry, wat hopelik goed te pas gaan kom in die twee toernooie in Kaapstad.”
Voordat Dreesbeimdieke haar beroepstatus gekry het, het sy tydens die SA Amateur Vroue putjiespelkampioenskap by die Stellenbosch-gholfbaan in Julie 2017 algeheel tweede geëindig en is net deur haar Amerikaanse spanmaat Cara Gorlei geklop.
In volgende week se Investec Suid-Afrikaanse Vroue Ope staan 'n gesamentlike prysgeld van R2 miljoen op die spel, wat vyf keer meer as laas week se KZN-toernooi is.
– Bygewerk van sunshineladiestour.com
Die Namibiese professionele gholfspeler Jessica Dreesbeimdieke wil oor die volgende twee weke die lang reis vanaf die Amerikaanse staat Florida na Suid-Afrika laat tel, wanneer sy in twee toernooie van die Sonskyn-vrouetoer meeding.
Dreesbeimdieke begin speel môre in die Kaapstad Vroue Ope by die Royal Cape Town-gholfklub, in die aanloop tot volgende week Donderdag se Investec Suid-Afrikaanse Vroue Ope by die Westlake-gholfklub.
Die 22-jarige voormalige Windhoeker, wat laas jaar 'n BA-graad aan die Universiteit van Denver verwerf het, het laas week ook stewig gevaar in die SuperSport Ladies Challenge wat by die Wild Coast-buiteklub in KwaZulu-Natal gespeel is.
Teen 'n sterk veld van internasionale spelers was Dreesbeimdieke die algehele voorloper ná die eerste dag met 'n 4-onder-syfer 66. Winderige toestande het haar nie gekeer om vyf voëltjies te behaal op pad na 'n voorsprong van twee houe nie. Net by een putjie het sy 'n hou aan syfer afgestaan.
“Ek het baie goed begin, met voëltjies op die eerste twee putjies. Teen daai dwarswind het my voëltjie op putjie 17 (syfer 3) soos 'n volmaakte gelukhou gevoel. Ek het 40 meter regs van die pen gemik en die bal het net links van die putjie bly lê, vir 'n sethou van sewe meter vir die voëltjie.”
Op dag twee het sake egter minder vlot verloop met 'n ronde van 76 wat haar na die gesamentlike vierde posisie laat terugsak het, voordat sy op die finale dag 73 behaal het vir 'n gesamentlike agtste eindposisie (prysgeld R11 220).
Skotland se Jane Turner het die toernooi met 4-onder syfer 206 gewen (prysgeld R56 000), met Dreesbeimdieke op 215 houe.
“Die toernooi by Wild Coast Sun was vir my 'n goeie een. Ek was uiteraard teleurgesteld dat ek in die tweede ronde nie so goed gespeel het nie, maar ja, die wind het nogal sterker gewaai soos die dag gevorder het.
VSA-SEISOEN DIE GROTER DOEL
“In die geheel is ek steeds tevrede om in die top-10 te kon klaarmaak. Dit is maar net my tweede Sonskyn-toernooi en my eerste gholftoernooi sedert Oktober laas jaar,” sê sy.
Die vorige week het Dreesbeimdieke by die SA Vroue Meesters by San Lameer nie so blink gevaar nie, maar het nogtans die afsnypunt vir die laaste twee rondes gehaal.
“My hoofdoel vir die toernooie in Suid-Afrika is om van die afseisoen se roes af te skud en terug in kompeterende gholf te kom voordat die Amerikaanse seisoen volgende maand in erns begin.
“Om dus reeds in my tweede toernooi 'n voorloper te kon wees, was reeds 'n heerlike gevoel. Ek voel definitief dat ek my selfvertroue en momentum begin terugkry, wat hopelik goed te pas gaan kom in die twee toernooie in Kaapstad.”
Voordat Dreesbeimdieke haar beroepstatus gekry het, het sy tydens die SA Amateur Vroue putjiespelkampioenskap by die Stellenbosch-gholfbaan in Julie 2017 algeheel tweede geëindig en is net deur haar Amerikaanse spanmaat Cara Gorlei geklop.
In volgende week se Investec Suid-Afrikaanse Vroue Ope staan 'n gesamentlike prysgeld van R2 miljoen op die spel, wat vyf keer meer as laas week se KZN-toernooi is.
– Bygewerk van sunshineladiestour.com
Kommentaar
Republikein
Geen kommentaar is op hierdie artikel gelaat nie