Jeep op koers met Compass

Jeep se nuwe Compass is ná 11 jaar gereed om sy aflosstokkie aan sy opvolger te oorhandig.Die Compass is in 2006 saam met die Patriot bekend gestel. Dié twee kompakte sportnutse het elk ’n eie teikenmark in die oog gehad: Die Compass moes vroulike kopers lok, terwyl die Patriot ’n manlike gehoor in die visier gehad het.Om hierdie rede het Jeep die Compass dan voorsien van ’n sagte voorkoms met sagte hoeke en kurwes. Die Patriot was baie hoekig en met prominente wielboë. Sedertdien het die groep ’n finansiële krisis aan die einde van die vorige dekade oorleef, waarna hy deur Fiat oorgeneem is.Met die Italianers aan die stuur word gepoog om meer sinergie tussen die Italiaanse en die Amerikaanse meganika te bewerkstellig.So byvoorbeeld het die nuwe Renegade, Jeep se kleinste sportnuts, die onderstel van die Fiat 500X. Hulle word op dieselfde monteerbaan in Turyn gebou – die eerste keer dat ’n Jeep in Europa aanmekaargesit word.Nog sinergie is op pad. Fiat wil byvoorbeeld die nuwe Grand Cherokee op die Alfa Romeo Giulia-sedan se platform skoei, maar dalk met ’n ekstra paar sentimeter in die asafstand.Vandag is die segment vir kompakte sportnutse wêreldwyd vuurwarm. Dus wil Jeep so gou moontlik ’n produk in dié winsgewende deel van die mark beskikbaar hê. Die groep gaan egter nie weer twee sustermodelle tegelykertyd op die mark plaas nie. Daar sal net een kompakte sportnuts wees.Jeep het vir dié enkele model die naam Compass gekies. Patriot, is gedink, sal te veel kopers afskrik in oorsese markte soos Asië, Suid-Amerika en Afrika. Nog bedryfsnuus oor die nuwe Compass is dat die nuweling in vier lande gebou gaan word, maar nie in Amerika nie.Die Noord-Amerikaanse markte kry hul Compass-modelle uit Jeep se fabriek in Mexiko. Suid-Amerika sal syne uit Brasilië ontvang. China se Jeeps word in China gebou, en regterstuurmarkte soos Suid-Afrika en Australië sal hul Compasse uit Indië kry. Dit beteken dat die nuwe Compass inderdaad Jeep se eerste ware wêreldmodel is. Hy is ontwerp om oor die wêreld heen gebou en versprei te word.Die voorkoms is nie so hardebaard soos die ou Patriot s’n nie, maar ook nie so gerond en vroulik soos die ou Compass s’n nie.’n Goue middeweg, dus.Die enjin sal voor in die neus sit. Aandrywing sal in die meeste modelle na die voorwiele gaan. Topmodelle sal egter met ’n 4x4-stelsel aangeskaf kan word. Basiese modelle kry ’n sesgang-handrat- of ’n outomatiese ratkas, maar Jeep se negegang-outo’kas sal in die meeste gevind word.Jeep volhard met sy vier afwerkingsvlakke wat reeds by die Cherokee geld: Sport, Latitude, Limited en Trailhawk. Die eerste drie weergawes is padvriendelik in hul voorkoms: ’n normale grondvryhoogte van 19 cm, en lae buffers voor en agter.Die Trailhawk sal die topmodel wees en is met 4x4-aandrywing toegerus. Sy grondvryhoogte sal 22 cm wees. Hy het 4x4-vastrap, en die buffers sal ’n veel beter nader- en vertrekhoek bied, sodat jy hom met vertroue op ’n ruwe grondpaadjie kan neem.Die Trailhawk sal ook ’n aangepaste weergawe van die negegang-ratkas hê wat ’n korter eerste rat bied vir klouterwerk in die veld, skuurplate voor en agter onder die pens, en bande met ’n growwer greep.Al vier modelle sal ’n ritmodusknop bied; maar waar die middelslagmodelle bloot demper- en stuurvariasies sal bied, sal die Trailhawk ook toegang skep tot ’n veldrymodus wat jou ratverhoudings en vering vir klouterwerk pasmaak.Inligting oor watter enjins ingespan sal word, is skraps, maar ons vermoed die groep se bestaande 1.4-liter-turbo, die normaal-geaspireerde 2.4-liter en ’n 1.6-liter-turbodiesel sal wel vir ons plaaslike mark oorweeg word.Terwyl die voorkoms veel moderner en hupser is, kan verwag word dat die nuwe Compass tog heelwat duurder sal wees, wat te verstane is.Oorsee word gepraat van ’n sprong van N$30 000 vir die intreemodel, wat verder kan rek namate ’n mens hoër op in die spesifikasievlak gaan.Ons verwag die nuwe Compass oor net ’n paar maande later vanjaar plaaslik. – Netwerk24

Jeep op koers met Compass

Kommentaar

Republikein 2026-05-05

Meld asseblief aan om kommentaar te lewer

Jeep op koers met Compass

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.