Jagluiperdfonds hou 20ste galadinee

Die Jagluiperdbewaringsfonds (CCF) gaan vir die 20ste agtereenvolgende jaar die jagluiperd se spoed en elegansie vier.Dié geleentheid sal môre by hul jaarlikse galadinee by die Windhoek Buitekluboord plaasvind. Die gasspreker is dr. Greg Rasmussen, 'n bewaringsbioloog van die Painted Dog-navorsingstrust in Zimbabwe.Rasmussen is die stigtingsdirekteur van Painted Dog, 'n wêreldkenner van Afrika-wildehonde en ook 'n jare lange vennoot en goeie vriend van CCF se stigtingsdirekteur, dr. Laurie Marker. Rasmussen doen sedert 1988 navorsing oor wildehonde. Hy het sy DPhil-graad aan die Universiteit van Oxford se Wildbewaring-navorsingseenheid (Wildcru) verwerf en het al meer as 30 navorsingsverslae oor wildehondgedrag gepubliseer. Rasmussen is ook deel van beide die nasionale en internasionale komitees vir karnivoorbewaring en is 'n lid van die Groothond-spesialisgroepe in die Wêreldbewaringsunie (IUCN), asook die Range Wide-bewaringsprogram vir jagluiperds en wildehonde, wat help om dié spesies vir die toekoms te bewaar.Met die wildehondbevolking in Afrika wat van 'n halfmiljoen tot minder as 5 000 gedaal het, is hierdie diere deur IUCN as 'n bedreigde spesie gelys. Volgens 'n CCF-verklaring is die wildehondbevolking in Zimbabwe verbind met al vyf buurlande – Namibië, Botswana, Zambië, Suid-Afrika en Mosambiek, en uit dié lande het Zimbabwe die sleutelbevolking vir hierdie spesie.Die Painted Dog-navorsingstrust is buite die Victoria-valle gebaseer en werk saam met nasionale parke, private safarimaatskappye en kommunale boere. “Oorgrensinisiatiewe is 'n fokuspunt van hul bewaringswerk, want wildehonde ken geen internasionale grense nie,” sê CCF. Painted Dog se navorsing strek al langs die Zambezirivier deur Botswana, Zambië en Namibië, wat hulle in staat stel om hul kennis met dié lande te deel. “Ek is baie opgewonde daaroor dat Rasmussen by vanjaar se gala die gasspreker is,” het Marker gesê. “CCF werk aktief in die oostelike kommunale gebiede waar daar erge konflik tussen Namibiese veeboere en die land se bedreigde wildehondbevolking is. Ons hoop om uit Greg se ervaring en kundigheid te leer.”Kaartjies vir die galadinee is steeds beskikbaar en kos N$650 per persoon en N$6 500 vir 'n tafel met sitplek vir 10. Dit sluit in 'n drankie voor ete, 'n driegangmaaltyd, die spreker se aanbieding, die toekenningseremonie, 'n veiling en gratis toegang vir 'n begeleide toer by die CCF-sentrum. Kontak me. Heike Stackman by 067 304 806 of ccfinfo@iway.na om kaartjies te koop.

Jagluiperdfonds hou 20ste galadinee

Kommentaar

Republikein 2025-10-29

Meld asseblief aan om kommentaar te lewer

Jagluiperdfonds hou 20ste galadinee

Kommentaar

Republikein 2025-10-29

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.