Jaglegende sterf

Francoise Steynberg – Die vader van die Namibiese jagbedryf, mnr. Volker Grellmann (77), het Sondagnag in 'n Windhoekse hospitaal gesterf ná hy Saterdag ’n hartaanval gehad het.Die Namibië Professionele Jagtersvereniging (Napha) het gister hul skok en hartseer oor die heengaan van ’n legende in die Namibiese jag-, bewarings- en toerismebedryf uitgespreek. “Ons is baie hartseer oor die verlies en besef hy laat ’n reuseleemte, wat op verskeie vlakke gevoel sal word. Volker se liefde en passie vir volgehoue bewaring en die etiese jagbedryf, asook sy passie vir onderrig en om inligting te deel, sal grootliks gemis word,” lui ’n verklaring van Napha.Grellmann is in 1942 in Duitsland gebore en het sedert 1952 in Namibië gewoon. Ná skool het hy mode- en advertensieontwerp in München in Duitsland gestudeer, “maar sy lewe het op ’n ander safari gegaan”.Hy is in 1966 met Anke getroud en saam het hulle in 1970 die jagsafarimaatskappy, Anvo (’n samestelling uit hul name Anke en Volker), gestig met bewaring deur selektiewe jag as doel. Die egpaar het twee seuns, vyf kleinkinders en een agterkleinkind. Grellmann het Napha in 1974 gestig en was president van die vereniging van 1983 tot 1991 met lewenslange erelidmaatskap. Lewenslange erelidmaatskap is ook deur Safari Club International (SCI), die Internasionale Professionele Jagtersverening (Ipha) en die Afrika- Professionele Jagtersvereniging (Apha) aan hom toegeken.Hy was ook ’n stigterslid van onder meer Apha en die Federasie van Namibiese Toerismeverenigings (Fenata). Ook op toerismefront was hy in 1975 SWA Safaris se besturende direkteur. In 1974 het Grellmann die Eagle Rock-jagskool (EHRS) gestig en in 2002 die Eagle Rock- Professionele Jagakademie (Erphan). Daar het honderde minderbevoorrgte Namibiese jaggidse en professionele jagters hul opleiding gekry ná ’n leerplan vir ’n jaggidskursus vir die ministerie van die omgewing en toerisme deur Napha ontwikkel is.Sedert 1996 was Grellmann die eienaar van Etango Ranch en in 2003 die Etango-gasteplaas regoor die Internasionale Lughawe Hosea Kutako. Toekennings wat Grellmann verwerf het, is onder meer die Uitstaande Internasionale Jagterstoekenning in 1995, 'n erkenningstoekenning van die Internasionale Professionele Jagtersvereniging (Ipha), ’n bewaringstoekenning van Napha in 2005 en in 2006 vir jagluiperdbewaring deur die Cheetah Conservation Foundation (CCF).Voorts was Grellmann komiteelid en voorsitter van onder meer Napha se etiese komitee (en hy was Napha se ombudsman), die Luiperd- en Grootwildkomitee en Safaricare. “Hoewel hy sy jaggeweer vir die pen en akademie opgehang het, het hy nie op die werksfront afgeskaal nie. Sy jongste projekte sluit ’n boek oor onder meer die San en sy jagherinneringe in, en die inkomste sal aan die San in Namibië gaan,” sê Napha. Grellmann het veskeie navorsingsprojekte, soos luiperd- en jagluiperdnavorsing, ondersteun en was betrokke by omgewing- en nasionale toerismestrategieë en -beleide, die opleiding van wildbewaarders vir teenstropingseenhede in kommunale gebiede, asook by inheemse mense se ontwikkeling en menseregte. “Napha waardeer die Grellmann-familie se jare lange ondersteuning, ook dié van Anke wat grootliks in die agtergrond nie altyd die nodige erkenning geniet het nie.”Napha spreek hul innige meegevoel en simpatie met Grellmann se geliefdes en familie uit. “Hy was ’n nederige mens met die geheue van ’n olifant – ’n ware Namibiese jag- en bewaringsikoon.”francoise@republikein.com.na

Jaglegende sterf

Kommentaar

Republikein 2025-11-03

Meld asseblief aan om kommentaar te lewer

Jaglegende sterf

Kommentaar

Republikein 2025-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.