ITB-handelskou gekanselleer

Die internasionale handelskou, ITB Berlin 2020, is ná etlike dae van intensiewe samesprekings en ná verskeie uitstallers onttrek het, amptelik van die baan.Dít weens die moontlike gesondheidsrisiko wat die vinnige verspreiding van die coronavirus (covid-19) vir die verwagte 150 000 besoekers en uitstallers kan inhou. Die besluit is Vrydagaand deur die Duitse federale ministerie van gesondheid en die federale ministerie van ekonomie bevestig. Volgens dr. Christian Göke, uitvoerende hoof van Messe Berlin GmbH, is ITB Berlin met meer as 10 000 uitstallers uit meer as 180 lande uiters belangrik vir die wêreld se toerismebedryf.“Ons neem ons verantwoordelikheid vir die gesondheid en veiligheid van ons besoekers, uitstallers en werknemers baie ernstig op. Dit is met 'n swaar hart wat ons die kansellering van ITB Berlin 2020 moet aanvaar,” het hy gesê.Die voorsitter van die toesighoudende raad van Messe Berlin, mnr. Wolf-Dieter Wolf, het gesê ITB Berlin en Messe Berlin was in die 54 jaar van die handelskou se geskiedenis nog nooit in so 'n situasie nie.Intussen het die uitvoerende hoof van die Namibiese Toerismeraad (NTB), mnr. Digu //Naobeb, sy spyt oor die jongste toedrag van sake uitgespreek.“Die ITB sou aan die Namibiese toerismebedryf 'n wonderlike en professionele bemarkingsplatform bied om vir die 29ste agtereenvolgende jaar die land onder die vaandel van die Toerismeraad as reisbestemming te bemark,” het hy gesê. Hy het ook sy simpatie met mede- Namibiese uitstallers uitgespreek wat reuseverliese as gevolg van die kansellering van ITB 2020 gaan ly. Die NTB het nog nooit vantevore soveel vennote as vir vanjaar se handelskou geregistreer nie, naamlik 40 uitstallers, wat 122 verblyfsgeriewe, 24 reisoperateurs en vyf motorverhuringsmaatskappye insluit, wat hul produkte van 4 tot 8 Maart vir Namibië sou bemark. Drie opkomende klein- en mediumgrootte ondernemings was ook deel van die Namibiese afvaardiging. Air Namibia, Namibia Wildlife Resorts en Gondwana Collection Namibia het die NTB as strategiese vennote ondersteun.Volgens //Naobeb bevestig die groot vraag na Namibië die ITB se rol as belangrike platform om onder meer nuwe markgeleenthede te ontdek en mededingers se produkte te ontleed. Hy het erken die kansellering van die handelskou gaan 'n impak op Namibië se toerismebedryf hê. “In 'n tyd van krisis moet toerisme sy verantwoordelikheid as 'n integrale deel van 'n breër samelewing aanvaar. Die bedryf moet mense en hul welstand eerste stel. Die samewerking van die toerismebedryf is noodsaaklik om die verspreiding van die virus te stop en sodoende die impak daarvan op mense en gemeenskappe te beperk.”Hy het gemaan toeriste het 'n verantwoordelikheid om hulself in te lig voordat hulle reis om die risiko van oordrag te beperk. Ook moet hulle die riglyne van die Wêreldgesondheidsorganisasie (WHO) en hul eie nasionale gesondheidsowerhede volg.“Toerisme is kwesbaar vir die gevolge van noodgevalle in openbare gesondheid.”

ITB-handelskou gekanselleer

Kommentaar

Republikein 2026-02-03

Meld asseblief aan om kommentaar te lewer

ITB-handelskou gekanselleer

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.