Italiaanse strydrosse hang stewels op

Alessandro Zanni, een van die mees ervare spelers in die geskiedenis van Italiaanse rugby en 'n veteraan van vier Wêreldbekertoernooie, het sy stewels gister op 36-jarige ouderdom opgehang.

Dié losvoorspeler, wat ook as slot ingespan is, het sy toetsdebuut in 2005 teen Tonga gemaak en sy 119de en laaste toets in Februarie teen Skotland in Edinburg gespeel.

Zanni het ses keer in sy toetsloopbaan teen die Springbokke te staan gekom, met die laaste van dié ontmoetings in verlede jaar se WB-toernooi in Japan.

Zanni is saam met Martin Castrogiovanni (ook 119 toetse) slegs agter Sergio Parisse (142) in die tou wanneer dit by toetservaring vir Italië kom.

Volgens die Italiaanse Rugbyfederasie sal hy nou lid van Benetton se afrigting­span word. Hy het dié klub sedert 2009 as speler verteenwoordig.

• Nog 'n Italiaanse slot, die Nieu-Seelander van geboorte Dean Budd, het ook vandeesweek besluit om uit toetsrugby te tree. Dié 33-jarige het in 2017 sy toetsdebuut gemaak en in 29 toetse vir sy aangenome land gespeel.

In Italië se 2019 WB-toetsoorwinning met 47-22 teen Namibië het Zanni in die 4-trui begin en Budd is vroeg in die tweede helfte as sy slotmaat opgestuur.– Reuters, Sport24