Israel ná bloedbad internasionaal veroordeel

Minstens 58 mense is Maandag dood en 2 400 beseer toe Israelse magte toegeslaan het op Palestyne wat betoog het teen die opening van die Amerikaanse ambassade in Jerusalem.CNN berig die dodetal is veral weens Palestyne wat probeer het om oor 'n grensmuur te kom en gestuit is deur die Israeli's. Die Palestynse gesondheidsminister het die gebeure as 'n aaklige slagting beskryf en die internasionale gemeenskap gevra om tussenbeide te tree.Die Israelse premier, Benjamin Netanyahu, het die optrede verdedig en gesê enige land het die reg om homself te beskerm. Hy het gesê Israel het in selfverdediging opgetree teen Hamas, wat Israel wil vernietig, berig die BBC.Israel is verheug dat pres. Donald Trump die heilige stad erken as die Israelse hoofstad, maar Palestyne, wat Oos-Jerusalem as 'n toekomstige hoofstad beskou, is hewig ontsteld.'n Verteenwoordiger van die Palestynse gesondheidsdepartement sê minderjarige kinders tel onder die slagoffers.Tienduisende Palestyne het na die Gaza-strook se grens gestroom, van wie sommige tot naby die Israelse grensversperring gekom het – 'n lyn wat die Israelse leiers gesê het die Palestyne nie toegelaat sal word om oor te steek nie.Swart rookwolke van motorbande wat die betogers aan die brand gesteek het, hang in die lug. Betogers, van wie sommige met slingervelle gewapen was, het klippe na die Israelse veiligheidsmagte gegooi, wat met traangas en skerp ammunisie op hulle losgebrand het.WYD GEKRITISEERThe Guardian berig dat Israel ná die bloedbad internasionaal veroordeel word.António Guterres, sekretaris-generaal van die Verenigde Nasies (VN), sê hy is diep bekommerd oor die gebeure.Zeid Ra'ad al-Hussein, die VN se menseregtehoof, het die “skokkende moord van tientalle mense ” verdoem en gesê “diegene wat verantwoordelik is vir die skandalige menseregteskendings moet rekenskap gee”.Turkye het ook gesê hy gaan sy ambassadeurs in Amerika en Israel herroep. Recep Tayyip Erdogan, die Turkse president, het Israel se optrede as 'n “volksmoord” bestempel.Emmanuel Macron, president van Frankryk, het in 'n telefoonoproep aan Mahmoud Abbas, die Palestynse president, en koning Abdoellah II van Jordanië “die geweld deur die Israelse gewapende magte teenoor betogers veroordeel”.Hy het weer eens Amerika se besluit om die ambassade na Jerusalem te skuif veroordeel.Volgens The Guardian het Alistair Burt, Brittanje se minister van buitelandse sake vir onder meer die Midde-Ooste, gesê hy is bekommerd oor die situasie en dat die betogings deur “ekstremistiese elemente uitgebuit word”.Burt sê hy is hartseer oor die lewensverlies Maandag.“Geweld verwoes die pogings tot vrede. Brittanje bly verbind tot 'n tweestaat-oplossing, met Jerusalem as 'n gedeelde hoofstad.”Volgens die BBC is dié massabetogings deel van die ses weke lange opbou na die 70-jarige herdenking van die nakba, oftewel katastrofe, soos Palestyne verwys na die dag toe duisende hul huise moes verlaat ná die stigting van Israel op 14 Mei 1948. – Netwerk24

Israel ná bloedbad internasionaal veroordeel

Kommentaar

Republikein 2025-06-18

Meld asseblief aan om kommentaar te lewer

Israel ná bloedbad internasionaal veroordeel

Kommentaar

Republikein 2025-06-18

Meld asseblief aan om kommentaar te lewer

MELD AAN

Advertensie