Iran-situasie: 'VSA sluit pad na vrede'

Die Iran-situasie ontwikkel nou in 'n gevaarlike scenario, het Sergei Lawrof, Russiese minister van buitelandse sake, Dinsdag volgens die FIA-nuusagentskap gesê.Pres. Donald Trump van Amerika het Ajatolla Ali Chamenei, Iranse leier, en ander Iranse topamptenare Maandag met sanksies geteiken.Iran het daarna gesê dit het alle diplomasie nou tot niet gemaak en Amerika daarvan beskuldig dat hy die enigste pad na vrede verwerp het.Iran het verlede week 'n onbemande Amerikaanse verkenningsvliegtuig neergeskiet, waarna Trump vergeldingslugaanvalle kort voor die uitvoering afgestel het. Dit sou die eerste keer in dekades van vyandskap tussen dié twee lande wees dat Amerika Iran aanval.Trump sê hy het op die nippertjie besluit te veel mense sal sterf.Hy het Maandag 'n uitvoerende bevel uitgereik vir sanksies teen Chamenei en nog twee senior figure. Sanksies teen Jawad Zarif, minister van buitelandse sake, word later vandeesweek verwag.“Die instel van nuttelose sanksies teen Iran se opperleier en die bevelhebber van Iran se diplomasie kom neer op die permanente sluiting van die diplomatieke pad,” sê Abbas Moesa-wi, woordvoerder van Iran se buitelandse ministerie, op Twitter.“Trump se desperate administrasie verwoes die gevestigde internasionale meganismes wat wêreldvrede en veiligheid in stand hou,” het hy getwiet.Pres. Hassan Roehani het op TV gesê sanksies teen Chamenei sal geen praktiese impak hê nie, want hy het geen buitelandse belange nie.Roehani, 'n pragmatis wat twee verkiesings gewen en beloof het om Iran vir die wêreld oop te maak, beskryf Amerika se stappe as desperaat en bestempel die Withuis as “verstandelik gestremd”, 'n belediging wat Iranse amptenare in die verlede oor Trump gebruik het.“Teheran se strategiese verdraagsaamheid beteken nie ons is bang nie,” sê Roehani.John Bolton, Trump se nasionale veiligheidsraadgewer wat nou op besoek aan Israel is, het versoeke om gesprekke herhaal, solank Iran bereid is om verder te gaan as die bepalings van 2015 se kernwapenverdrag met wêreldmagte wat Trump verlede jaar opgeskort het.“Die president het die deur vir werklike onderhandelinge oopgehou om Iran se kernwapenprogram heeltemal en kontroleerbaar op te skort, sy voortsetting van leweringstelsels vir ballistiese missiele, sy steun aan internasionale terrorisme en ander kwaadwillige optrede wêreldwyd,” het Bolton in Jerusalem gesê.“Al wat Iran moet doen, is om deur daardie oop deur te loop.”Amerika het sedert verlede jaar verlammende ekonomiese sanksies teen Iran ingestel toe Trump hom aan 'n ooreenkoms tussen Teheran en wêreldmagte onttrek het om Iran se kernwapenprogram in te kort in ruil vir die opheffing van sanksies.Die krisis het sedert verlede maand vererger toe die Trump-administrasie sanksies verskerp en alle lande aangesê het om geen Iranse olie te koop nie.Dit het die Iranse ekonomie ontneem van sy hoofinkomste om kos vir sy 81 miljoen inwoners te koop en het hom met geen voordele gelaat om vir sy kernverdrag te wys nie.HOOGTEPUNTDie neerskiet van die Amerikaanse verkenningsvliegtuig – wat Iran sê in sy lugruim was, maar wat Amerika ontken – was die hoogtepunt van weke se opgeboude spanning en wat nou 'n militêre dimensie betree het.Die Amerikaanse administrasie sê die rede vir die sanksies is om Iran na die onderhandelingstafel te dwing. Die Iranse regering sê hy is bereid om te praat as Amerika eerstens die nuwe sanksies ophef, hoewel dit uit eergister se verklaring lyk of hy sy rug styfmaak.Amerikaanse amptenare het in die lig van die toenemende krisis 'n diplomatieke veldtog met sy bondgenote begin. Mike Pompeo, minister van buitelandse sake, is Maandag na die Midde-Ooste vir gesprekke met leiers van Saoedi-Arabië, die Verenigde Arabiese Emirate en die Arabiese Golfstate wat die strengste optrede teen Iran verkies.Brian Hook, Amerikaanse afgevaardigde na Iran, is in Europa, waar hy dalk 'n killer ontvangs kry van bondgenote wat die kernooreenkoms steun.Rusland het Dinsdag by monde van Nikolai Petroesjef, sekretaris van dié land se veiligheidsraad, gesê dié land het militêre intelligensie dat die Amerikaanse verkenningsvliegtuig wat neergeskiet is in die Iranse lugruim was.– Netwerk24/Reuters

Iran-situasie: 'VSA sluit pad na vrede'

Kommentaar

Republikein 2026-05-05

Meld asseblief aan om kommentaar te lewer

Iran-situasie: 'VSA sluit pad na vrede'

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.