Invalshoek - Werksetiek

Bekende motiveringsprekers en kundiges op die gebied van produktiwiteit gesels dikwels oor veranderende produktiwiteit en is bekommerd dat jonger mense nie dieselfde werksetiek as ouer generasies het nie.Verskeie bekroonde boeke is die afgelope dekade vrygestel oor die impak wat generasieverskille op die werksplek het. Daar word tans ses generasies geïdentifiseer gebaseer op die era waarin hulle gebore is hul ervaringe binne 'n bepaalde sosio-kulturele konteks.Die Tradisionele Generasie is tans 70 jaar en ouer en het reeds afgetree. Dan is daar die Baby Boomers wat tussen 51 en 69 jaar oud is en sowat 25 persent van die arbeidsmag uitmaak.Generasie X is tussen 36 en 50 jaar oud en maak sowat 31 persent van die arbeidsmag uit terwyl Generasie Y tussen 21 en 35 jaar oud is en 34 persent van die arbeidsmag uitmaak.Dan is daar Generasie Z van tussen ses en 20 jaar oud. Hulle verteenwoordig 9 persent van die arbeidsmag. Die sesde generasie, Generasie Alfa, is jonger as ses jaar oud.Generasie Z sal oor die volgende tien jaar sowat 31 persent van die totale arbeidsmag uitmaak met Generasie Y wat meestal aan die stuur van sake gaan staan.Generasie Y word as 'n waterskeidingsgenerasie beskou weens hulle beweerde, oënskynlike swakker werksetiek. Hulle optrede teenoor gesag het verander asook hulle ingesteldheid teenoor werk en die lewe.Oor die algemeen is die literatuur relatief negatief oor die jonger geslagte. Skrywers is besorgd oor toekomstige produktiwiteit en of dit moontlik sal wees vir jong mense om 'n goeie lewenstandaard te handhaaf.Elke generasie kyk na die lewe deur 'n bepaalde lens en vanuit verskillende perspektiewe. Elke geslag ervaar 'n ander daarom “anders”.Ek dink dit was nog altyd van die begin van die mensdom so. Ons het egter eers onlangs etikette aan geslagte gekoppel om hulle beter te bestudeer en te verstaan.Elke generasie beskik oor unieke eienskappe en talente en kan op 'n besonderse manier bydraes lewer wat ander generasies nie kon doen nie. Ons moet die positiewe bydrae van verskillende geslagte beklemtoon eerder as om te veralgemeen.In die film The Intern (2015) vertolk Anne Hathaway die rol van 'n moderne Generasie Y-leier wat 'n suksesvolle aanlyn modewinkel vestig. Sy deel die silwerdoek met die legendariese Robert De Niro, wat aangestel word as haar assistent nadat hy jare gelede afgetree het.Die kultuur wat uitgebeeld word, is een van openlikheid, vrolikheid en onbewustheid van status en rang. Almal het toegang tot alle ander spanlede en besluite word vinnig geneem. Daar word gereeld gou in kleiner spanne bymekaargekom om idees uit te ruil en soms vind die “vergaderings” via FaceTime of Skype plaas. Almal is die hele tyd in konstante kommunikasie, hetsy in persoon of via die virtuele ruimte.Hulle aanvaar nie net die status quo nie, maar bevraagteken idees in 'n strewe om beter diens te lewer.Robert De Niro se karakter is aanvanklik ongemaklik met rekenaars en nuwe kommunikasietegnologie, maar hy word vinnig touwys gemaak. Hy is bereid om te leer ten spyte van sy ouderdom, maar bring 'n ander dinamika na die werksplek met die wysheid en kennis wat hy danksy jare se ondervinding opgedoen het.Die film beeld 'n mooi simbiose uit tussen die verskillende generasies - 'n verhouding wat produktiwiteit bevorder. Die geheim is dat almal mekaar ondanks verskille respekteer.Werksetiek neem verskillende vorme aan. Kom ons omhels verskillende perspektiewe en aanvaar almal kan 'n waardevolle bydrae lewer.

Invalshoek - Werksetiek

Kommentaar

Republikein 2025-12-15

Meld asseblief aan om kommentaar te lewer

Invalshoek - Werksetiek

Kommentaar

Republikein 2025-12-15

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.