Invalshoek - Oom Tienie se inspirasie

Rudi Koekemoer - Ek het in Junie by die nasionale muurbalkampioenskap wat by die Wanderers Sportklub gehou is, gaan inloer.Dit was ‘n byekorf van bedrywighede, want daar was tagtig spelers wat in verskeie kategorieë mekaar die stryd aangesê het oor ‘n periode van drie dae. Die spelers het van heinde en verre gekom om passievol hulle talente ten toon te stel.Dit was dan ook ‘n geleentheid vir ou vriende en kennisse om weer hegte bande te smee en saam te bou aan nuwe herinneringe en staaltjies om te gaan oorvertel wanneer hulle weer tuis kom. Die braaivleisvure het eenkant gebrand terwyl die kinders op die gras baljaar het.‘n Paar spelers het eenkant strekoefeninge gedoen om op te warm vir die volgende kragmeting. Ander weer het gebruik gemaak van die masseuse om die spiere te laat ontspan.Daar is altyd daardie wedstryde wat mens nie wil misloop nie, soos wanneer enige van die toptien gekeurdes teen mekaar speel of wanneer een van die ou legendes een van die jonger generasie moet probeer uitoorlê. Ek het opgemerk dat die pawiljoen by een van die bane stampvol toeskouers gesit het en almal was besig om ‘n senutergende wedstryd te kyk.Toe ek nader staan, sien ek dit was Oom Tienie Botha wat teen ‘n jong man gespeel het. Die toeskouers was ingenome met die speletiek asook die unieke jakkalshoue van Oom Tienie wat sy opponent die hele tyd aan die raai gehou het.Oom Tienie is een van die legendes wat ‘n onuitblusbare passie vir muurbal, en sport oor die algemeen het. Hy en sy seun, Archie, reis die wêreld vol om aan meesterstoernooie deel te neem.Oom Tienie sukkel reeds vir jare met sy knieë en sy bene raak by die jaar bietjie bakker, maar speel, sal hy speel. Na die opwindende wedstryd wat hy net-net teen die jonger speler verloor het, het ek hom gevra wanneer hy die knievervanging gaan kry waaroor ons voorheen gesels het.Ek moes sy antwoord te wagte gewees het: “Dit moet eers nog so bietjie wag tot na die World Masters in die VSA.”Oom Tienie is reeds laat in sy sestigerjare en ek het hom jare gelede op ‘n muurbalbaan "raak gespeel". Of altans, hy het vir my ‘n les of twee gegee hoe om strategies die spel te speel, want “dis nie moerbal hierdie nie”.Intussen het ons saam aan verskeie toernooie in lande soos Hong Kong deelneem en is weereens bevoorreg om hierdie jaar deel te vorm van ‘n klein Namibiese afvaardiging na die World Masters Squash Championships in Charlottesville, Virginia vanaf 29 Julie tot 4 Augustus 2018. Hierdie jaar is daar selfs ‘n paar spelers wat ouer as tagtig jaar is wat gaan deelneem. Dit is voorwaar ‘n besonderse voorbeeld en prestasie!My pa het self hierdie jaar die tagtigmerkie op sy kerfstok gemaak en die opmerking gemaak dat hy steeds voel asof hy 21 jaar oud is. Hy het tot onlangs nog ‘n motor se enjin getrek om dit oor te doen vir ‘n kliënt. Dan doen hy steeds kleiner dienste op motors om homself besig te hou, want stilsit is nie ‘n opsie nie.Daar is min dinge wat so inspirerend is as om die veggees en lewenslus van iemand soos Oom Tienie te sien, wat baie ouer in jare as mens self is. Dit gee mens moed om te volhard en dankbaar te wees vir gesondheid en die voorreg om sport te kan beoefen.

Invalshoek - Oom Tienie se inspirasie

Kommentaar

Republikein 2025-11-06

Meld asseblief aan om kommentaar te lewer

Invalshoek - Oom Tienie se inspirasie

Kommentaar

Republikein 2025-11-06

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.