Invalshoek - Die wêreld se grootste uitdagings

Die afgelope tyd is verskeie boeke en artikels vrygestel wat navorsingsbevindinge bekend gemaak het oor die uiteenlopende opvattings, waardes en gedrag van die verskillende generasies wat tans saam hulle plekkie in die son moet vind.Die bevindinge is ‘n mengelmoes wat die hele spektrum van positief tot by negatief dek.Die navorsers is dit eens dat daar wel ‘n verskil in lewensuitkyk tussen die generasies is en dat die nuwer generasies meer lewenswys op ‘n jonger ouderdom is. Hulle vorm ook sterker opinies oor wêreldaangeleenthede en heg groter waarde aan menseregte, terwyl die ouer generasies ‘n sterker werksetiek het en die akker wat God aan hulle gegee het met toewyding bewerk.Die Wêreld Ekonomiese Forum het in 2017 ‘n opname onder 31 000 nuwe generasie-respondente (“Millennials”) gedoen, wat tussen 18 en 35 jaar oud was en 186 lande verteenwoordig het. Die doel was om vas te stel wat hierdie groep tans as die grootste uitdagings in die wêreld sien. Die “Global Shapers Survey” is in Augustus 2017 vrygestel.Byna die helfte van die respondente (48,8%) het klimaatsverandering as die grootste bekommernis geïdentifiseer wat ‘n noemenswaardige impak op die wêreld gaan hê. Aardverwarming en die verandering van weerpatrone het reeds ‘n impak op voedselsekuriteit en die beskikbaarheid van water, 'n impak op armoede, nasionale rampe en gesondheidsprobleme (die uitbreek van siektes) het.Sowat 78,1% van die respondente het hulself bereid verklaar om indringende leefstylaanpassings te maak om die omgewing te beskerm, want 91% het saamgestem die mens is vir klimaatsverandering verantwoordelik.Die media het die afgelope tyd verslag gedoen oor die impak wat plastiek op die wêreld se oseane het. ‘n Verslag wat heet “Plastic Debris in the World’s Oceans” meld dat daar jaarliks 260 miljoen ton plastiek in die wêreld vervaardig word waarvan 10% in die see beland.Daar word verder bevind dat 70% van die plastiek uiteindelik na die bodem sink en dan seelewe beskadig. Die grootste probleem is dat 91% van alle plastiek nie herverbruik word nie.Hierdie is maar een voorbeeld van die impak wat die mens op die natuur het. Daar is reeds baie gesê oor die impak van steenkool, olie en vele ander faktore op die osoon en die direkte verhouding tot klimaatsverandering.Die top tien kritieke aangeleenthede wat geïdentifiseer is tydens die opname en volgens respondente dringend aandag van wêreldleiers verg, is klimaatsverandering (48,8%); oorlog en konflik (38,9%); ongelykhede en diskriminasie (30,8%); armoede (29,2%); godsdiensgemotiveerde konflik (23,9%); aanspreeklikheid, deursigtigheid en korrupsie deur regerings (22,7%); voedsel- en watersekuriteit (18,2%); swak onderwys (15,9%); veiligheid en sekuriteit (14,1%) en 'n tekort aan ekonomiese geleenthede en werksekuriteit (12,1%).Nadat ek die verslag gelees het en besef het hierdie kritieke kwessies raak 186 wêreldlande, het ek opnuut tot die gevolgtrekking gekom alle lande in die wêreld sal moet saamwerk om hierdie probleme op te los. Namibië staar dieselfde uitdagings, met die uitsondering van enkeles, in die gesig. Ons nasionale ontwikkelingsplanne is juis geformuleer om dieselfde aangeleenthede aan te spreek.Ek dink dit is wys om ons jonger generasies te betrek by nasionale dinkskrums en strategiese beplanning, want dit wil voorkom asof hulle die werklike uitdagings goed verstaan en dalk met nuwe, innoverende oplossings vorendag kan kom, juis omdat hulle ander sienswyses oor die lewe het.

Invalshoek - Die wêreld se grootste uitdagings

Kommentaar

Republikein 2025-07-01

Meld asseblief aan om kommentaar te lewer

Invalshoek - Die wêreld se grootste uitdagings

Kommentaar

Republikein 2025-07-01

Meld asseblief aan om kommentaar te lewer

MELD AAN

Advertensie