Invalshoek - Die weermag in tye van vrede en nood

Rudi Koekemoer - Die afgelope tyd was daar verskeie onaangename voorvalle tussen verdedigingsmagte wat ontplooi is in verskeie dorpe en die publiek.Verskeie insidente wat op Hentiesbaai afgespeel het, is in die sosiale media verkondig met mense wat sê hul vrees ongegronde inhegtenisnemings weens roekelose misbruik van mag deur die weermag.Ek gebruik doelbewus die term “weermag”, want dit is presies hoe hierdie magte optree te midde van die krisis wat ons land en die hele wêreld tans lamlê.Die soort optrede lyk nie vir my na geïsoleerde voorvalle nie. Tydens Operasies Hornkranz en Kalahariwoestyn is verskeie sulke insidente die afgelope jaar aangemeld.My indruk is weermagpersoneel verstaan nie hul rol in die gemeenskap nie en weet nie hoe om hul mag te hanteer nie. Die rondbeweeg van gewapende soldate gee baie mense koue rillings omdat sommige personeellede nie weet hoe gesonde oordeel te gebruik en mense met respek te behandel nie.Die weermag word in baie lande as vredesmagte ingespan en om humanitêre hulp te verleen tydens rampe. Die magte word opgelei om in diens van die land en sy mense te staan en verstaan hulle moet verantwoordelik optree.Wanneer soldate weens humanitêre redes ontplooi word, soos weens Covid-19, word hul nie bewapen nie en mag niemand intimideer nie. Hulle help met die verspreiding van kos, help met mense wat siek is of handhaaf orde deur interpersoonlike vaardighede toe te pas.Sulke vredesmagte word vaardighede geleer soos om empatie te toon, konflikhantering, probleemoplossing, om verskillende kommunikasietegnieke toe te pas afhangende van die situasie, om 'n situasie vinnig te ontleed en met die minste moontlike ontwrigting of spanning op te los. Die magte moet kalmte verseker deur konsekwente, gedissiplineerde optrede wat vertroue en respek kweek.Die VSA, byvoorbeeld, het streng toelatingsvereistes vir individue wat die militêre diens wil betree. Jy moet 'n burger wees, in 'n bepaalde ouderdomsgroep val, geen mediese of fisieke gebreke hê nie, geen kriminele rekord of negatiewe krediet- of finansiële agtergrond hê nie, geen geskiedenis van alkohol- en dwelmmisbruik hê nie en ten minste oor kollegetoelating beskik. Slegs personeel met 'n B-graad van vier jaar word as offisiere oorweeg. Aansoekers word aan deeglike psigoanalitiese toetse onderwerp om hul karakter te bepaal en seker te maak hul ly nie aan gedragsteurnisse nie.Keuring is uiters streng omdat iemand wat bewapen word en in 'n magsposisie geplaas word 'n baie groot verantwoordelikheid het. Hoogs intelligente individue is nodig, wat kan redeneer, situasies kan opsom en selfbeheersing kan toepas. Die weermag is nie 'n werkskeppingsorganisasie nie, maar 'n instelling wat die beste mense benodig om 'n land en sy burgers te dien.Namibië moet soortgelyke hoë standaarde aanvaar en toepas. Myns insiens moet soldate nie net dissipline en gevegsvaardighede aanleer nie, maar baie klem moet gelê word op diensbaarheid aan die gemeenskap en begrip van die vredesmagkonsep.Opleiding moet gereelde gemeenskapsdiens insluit, sonder gevegsuniforms en vuurwapens. Magte moet gekondisioneer word dat hulle eintlike rol is om vrede te bewaar en om in diens van landsburgers te staan.Militêre opleiding alleen sal veroorsaak dat soldate nie weet hoe om ander rolle te vervul nie.Ons weermag kan van veel groter diens wees indien lede die rol van 'n vredesmag kan speel.

Invalshoek - Die weermag in tye van vrede en nood

Kommentaar

Republikein 2026-04-13

Meld asseblief aan om kommentaar te lewer

Invalshoek - Die weermag in tye van vrede en nood

Kommentaar

Republikein 2026-04-13

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.