Intrige wag tussen wegspring en eindstreep

Andrew Poolman - Die prestige van 'n nasionale kampioenskap sluit in dat die Namibiese padfietskampioene in die individuele tydtoets en die padresies 'n trui in die kleure van die landsvlag ontvang waarin hy vir die volgende 12 maande mag ry.Die naweek se kampioenskap wat vir die derde jaar deur Pupkewitz Megabuild geborg word, sal dus soos gewoonlik die deelname van al die voorste ryers in die land lok.Till Drobisch, die verdedigende kampioen wat in 2017 'n paar sentimeter voor Dan Craven oor die eindstreep gesnel het, het die dubbele eer behaal nadat hy twee dae tevore ook in die individuele tydtoets die vinnigste was.Drobisch sal nie die naweek teenwoordig wees nie vanweë eksamenverpligtinge in Duitsland, waar hy ook aan 'n fietsryspan verbonde is, maar dit doen geen afbreuk aan wat beloof om 'n vuurwarm mededinging tussen vele potensiële wenners te wees nie.Craven is 'n voormalige nasionale titelhouer en is altyd 'n sterk aanspraakmaker. Die feit dat hy by die wegspringstreep sal aantree voordat hy by sy nuwe span oorsee gaan aansluit, wys dat hy ondanks sy 35ste verjaarsdag gister steeds groot waarde daaraan heg om die nasionale trui op sy wêreldreise te mag dra.Craven het die afgelope naweke ook in die eerste twee wedrenne van die Nedbank Windhoek Pedal Power gery en kon dus 'n eerstehandse gevoel kry vir die werkinge van sommige van die plaaslike spanne wat in dié kompetisie meeding. Die intrige van waarskynlike spanwerk wat teen Craven se onbetwiste strategiese intelligensie en ondervinding opgeweeg word, kan een van die groot faktore vir die naweek wees.Volgens die organiseerders sal die roete nie net spoed en stamina nie, maar ook klimvermoë van die aspirerende wenner vereis.Manne soos Gerhard Mans Junior, Lotto Petrus, die voormalige driekampspesialis Drikus Coetzee, Martin Freyer, Xavier Papo, Jo Jo Hamunyela en die bestendige Ingram Cuff het almal die stamboek om die verwagte stryd tot die bitter einde te wen.Met die uitmergelende standaard wat die afgelope naweke volgehou is en die ontluiking van 'n groep sterk juniors, is dit nie ondenkbaar dat die manskampioen selfs van buite hierdie lysie kan kom nie.Onder die vroue het Vera Adrian die afgelope weke in haar resiese teen die elite mans besonder sterk gelyk en dit sal inderdaad 'n verrassing wees as sy nie haar prestasie van 2017 herhaal nie. Adrian het laas jaar die tydtoets én die padresies beklink en dit sal 'n geweldige poging van ander moontlike aanspraakmakers soos Michelle Vorster, Michelle Döman, Irene Steyn en diesulkes kos om haar te keer. Die naweek se program:Vandag 16:00: individuele tydtoets, 45 km vir elite mans is, 22 km vir elite vroue.Sondag 07:00: nasionale padresies, 145 kilometer vir elite mans, 107 km vir elite vroue.Vir beide kampioenskappe dien Caren Park by Brakwater as die begin- en eindpunt.

Intrige wag tussen wegspring en eindstreep

Kommentaar

Republikein 2025-05-01

Meld asseblief aan om kommentaar te lewer

Intrige wag tussen wegspring en eindstreep

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie