Intel beloof toestelle sal binne ’n week veilig wees

Petrus Malherbe - Apple-gebruikers word aangeraai om dadelik hul toestelle se sagteware op te gradeer nadat die maatskappy Maandag broodnodige sekuriteitsopgraderings uitgereik het.Die opgradering beskerm iPhone-, iPad- en Mac-gebruikers teen die gevare van die foutiewe Intel-rekenaarskyfies wat sedert verlede week opslae maak.Die jongste weergawe van Apple se iOS-bedryfstelsel, 11.2.2., beskerm gebruikers teen die moontlike indringing van kuberkrakers wat vroeër via die foutiewe rekenaarskyfies toegang tot sensitiewe inligting kon verkry. Nadat Apple verlede week aangekondig het dat “elke iPhone, iPad en Mac-toestel kwesbaar is vir aanvalle” het die maatskappy geskarrel om gebruikers so gou moontlik daarteen te beskerm. Nuwe sagteware word na verwagting ook Dinsdag uitgereik om gebruikers van Apple se Safari-webblaaier te beskerm. Intussen het Brian Krzanich, Intel se uitvoerende hoof, in ’n toespraak op die CES-tegnologiekonferensie in Las Vegas gesê 90% van toestelle wat deur die sekuriteitsfout geraak is, sal binne ’n week opgraderings ontvang wat dit sal beveilig. Buiten Apple-toestelle word rekenaars wat bedryf word deur Linux en Microsoft, asook Android-toestelle, geraak.“Sekuriteit en die beveiliging van ons kliënte se data is ons primêre fokus,” het Krzanich gesê en opnuut herhaal dat daar tot op datum geen bevestigde gevalle was van enigiemand wat deur die Intel-fout skade gely het nie. Hy het die bedryf bedank vir hul samewerking om die probleem so spoedig moontlik op te los.Dit het intussen ook aan die lig gekom dat Intel ’n interne kubersekuriteitsgroep op die been gaan bring om te voorkom dat soortgelyke sekuriteitsprobleme in die toekoms opduik.Intussen het die kwessie van toestelle wat stadiger gaan word weens die nodige sekuriteitsopgraderings, weer kop uitgesteek. Sommige kenners meen toestelle kan tot 30% stadiger funksioneer, hoewel Intel sê dié syfer is ’n oordrywing.“Ons glo die impak van die opgraderings gaan van die werklading afhang,” het Krzanich in sy toespraak gesê. “Daarom verwag ons dat party werkladings ’n groter impak sal hê as ander.”Leslie Culberstone, wat sedert 1979 by Intel werk, is aangestel om die nuwe kubersekuriteitsgroep te lei. – Netwerk24/BBC/ Bloomberg/Reuters

Intel beloof toestelle sal binne ’n week veilig wees

Kommentaar

Republikein 2025-09-17

Meld asseblief aan om kommentaar te lewer

Intel beloof toestelle sal binne ’n week veilig wees

Kommentaar

Republikein 2025-09-17

Meld asseblief aan om kommentaar te lewer

MELD AAN

Advertensie