Ingo sterk geplaas in Afrika-tydren

Andrew Poolman - Die Namibiese motorfietsryer Ingo Waldschmidt is reeds verby die halfpadmerk van sy eerste deelname aan die Afrika Eco-tydren in Noord-Afrika.
Die deelnemers sou gister in Marokko ’n rusdag geniet en gereed maak om in die volgende skof die grens na Mauritanië oor te steek.
Die Afrika Eco-tydren se wegspring was in Nador, Marokko. Die tydren van meer as 6 000 km loop op Sondag 11 Januarie ten einde wanneer die 12de skof in Senegal se hoofstad, Dakar, klaarmaak.
Waldschmidt het Saterdag tydens die vyfde skof redelik tyd verloor, maar bevind hom steeds in ’n skaflike vierde plek van die motorfietsjaers. Sy roeteboek het grootliks van die werklike roete verskil en hy kon nie die oorsaak bepaal nie, behalwe om te wonder of hy dalk ’n deel van die boek agter gelaat het.
Nog ’n Russiese jaer het op dieselfde plek verdwaal en saam-saam kon die twee steeds nie bepaal waar hulle verkeerd gery het nie. Die twee jaers het teruggedraai, maar die wind was so sterk dat hul spoor terug reeds uitgewis was.
Ondanks die swak sigbaarheid in die stofstorm het hulle ’n ruk lank vergeefs rondgesoek totdat hulle genoodsaak was om die organiseerders te skakel.
Die kommunikasiegaping tussen die Franssprekende organiseerders en Waldschmidt se Engels is uiteindelik te bowe gekom sodat ’n helikopter gestuur is om die twee verdwaalde jaers terug op koers te help.
Waldschmidt se frustrasie is ietwat gekalmeer toe hy besef dat hy steeds in die algehele vierde posisie is. Volgens sy GPS- en roetekenner in Namibië het die jaer glo sowat een uur en 15 minute verloor, hoewel hy die 15 minute weer teruggewen het toe hy eers weer op koers was. Die tydverskille tussen die jaers is redelik groot.
Waldschmidt se motorfiets het hom tot dusver goed gedra en het sover nie groot herstelwerk geverg nie. Hy sou gister se rusdag glo deurbring deur sy motorfiets en sy klere te was en seker te maak dat enige onduidelikheid oor die komende roete vroegtydig uitgestryk word.
Ondanks sy probleme met navigasie het hy tot dusver by al die vereiste punte op die roete aangemeld. Sy ondervinding as driemalige voltooier van Dakar-tydrenne in Suid-Amerika kom handig te pas en sy resep om ’n konstante snelheid te handhaaf, werp ook vrugte af. Waldschmidt se pas is trouens vinniger as wat gewoonlik tydens sy Dakar-deelnames die geval was.
Sy stewige posisie in die algemene resies is grootliks aangehelp toe hy die tweede skof oor 433 kilometer in die tweede plek afgesluit het.
Tydens die vroeër derde skof is die jaers vertraag toe een van die riviere op die roete wat veronderstel was om droog te wees, vol water was.