Inferno verwoes Metro op Swakopmund

Des Erasmus - Die ganse kompleks van die groothandelsaak Metro Cash & Carry en Metro Liquor op Swakopmund is in die nagtelike ure van gisteroggend tot op sy fondament deur ‘n verwoestende brand uitgewis. Skade van miljoene Namibiese dollars is deur die vuur veroorsaak.Die vlamme het ook na die aangrensende glashandelaar, Klimas Glass, versprei waar brandweermanne van die Swakopmundse munisipaliteit in die agterplaas beheer oor die vuur gekry het. Brandweermanne het in ’n stryd van ure daarin geslaag om geboue op aangrensende persele te beveilig deur onder meer die dakke en mure nat te spuit. Dit was die tweede brand dié naweek op die vakansiedorp. Vrydagoggend het ‘n voertuig ook op die perseel van ’n tehuis vir senior burgers, Welwitschia 2, uitgebrand. Die brand het digte rookwalms oor ‘n groot deel van Swakopmund laat hang, maar die skade was relatief gering.Mnr. Pierre Gouws, ‘n sakeman van Swakopmund, het gister aan Republikein gesê ‘n span werkers van sy onderneming is besig om ‘n dak op een van die geboue naby die Metro-kompleks te sit. Vroeg gisteroggend het een van die werkers hom in ‘n noodoproep meegedeel dat die Metro brand. Toe hy omstreeks vyfuur daar aankom, het brandweermanne reeds sterk in hul stryd gestaan. Dit het vroeëre beweringe bevestig dat die brand gisteroggend reeds omstreeks 03:00 uitgebreek het.Op die toneel was een van die beweringe gisteroggend dat brandstofjoggies van ‘n naburige diensstasie ook vroeg alarm gemaak het. Die Metro is naby die munisipale kompleks en ook die munispale brandweerstasie. Gisteroggend was die gebied vir verkeer afgesper en het honderde voetgangers op ‘n afstand gesien hoe brandweermanne se aandag steeds gespits was op plekke waar dit smeul. Dit is ook bekend dat die brand naby ‘n gebou was waar motorhuise deur van die sakeondernemings in die omgewing gebruik word. Mnr. Gouws het ook daar gehelp om van die voertuie na veiligheid te bring.Die hoof van Swakopmund se brandweer, mnr. Adri Goosen, het aan Erwin Leuschner van Republikein se susterskoerant Allgemeine Zeitung gesê die noodoproep oor die brand is gister om 04:01 ontvang. Toe die brandweer by die toneel opdaag, was die vlamme reeds 20 m hoog. Die het 'n rooi gloed in die nag veroorsaak en inwoners het wakker geword met die donker rookwolk wat steeds bo die dorp hang.Volgens die takbestuurder, mnr. Gieljam Visser, word die skade in hierdie vroeë stadium op sowat N$10 miljoen geraam. Gisteroggend was die oorsaak van die brand nog nie bekend nie, met ‘n volledige ondersoek wat dae kan duur.Dit is die tweede reusebrand in minder as 'n jaar wat 'n sakeonderneming op die dorp in puin lê. In Augustus verlede jaar het die apteek, Dolphin Pharmacy, afgebrand.

Inferno verwoes Metro op Swakopmund

Kommentaar

Republikein 2026-09-29

Meld asseblief aan om kommentaar te lewer

Inferno verwoes Metro op Swakopmund

Kommentaar

Republikein 2026-09-29

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.