Indonesiese toeriste ontdek Namibië

Francoise Steynberg 'n Indonesiese toeroperateur het pas met 'n toergroep deur Namibië gereis om die deure vir 'n reusetoerismemark van 250 miljoen Indonesiërs oop te maak. Me. Evi Aryati Arbay, IndonesiaTripAdvisors.com se direkteur, het pas haar eerste toergroep van Indonesië af gebring om Namibië te ontdek. IndonesiaTripAdvisors.com is 'n toeroperateur wat op eko-, avontuur- en kultuurtoerisme, en veral inheemse kulture in afgeleë gebiede fokus. Arbay het reeds Indonesiese toerismemarkte in Afrika in Ethiopië, Kenia, Uganda, Rwanda, Soedan, en Suid-Soedan gevestig en wil op die vasteland uitbrei. “Ek het Namibië en Angola gekies, veral omdat die Namibiese regering Indonesiërs sedert Augustus 2018 toelaat om die land sonder 'n visum te besoek. Dit volg ook op goeie betrekkinge, veral in die toerismesektor, ná verlede jaar se Indonesië-Afrika-forum,” het Arbay Maandag by die Indonesiese ambassadeurswoning in Windhoek aan Republikein gesê. Sy en haar Indonesiese toergroep was eers in Angola waarná hulle Opuwo en die Himba-mense besoek het. “Dit was 'n ongelooflike ervaring om saam met die Himbas te kuier en hul ryk kultuur te leer ken,” het sy gesê. Daarna het die toergroep die Etosha Nasionale Park met sy ryk wildlewe besoek. Een van die toergroeplede is 'n geoloog wat nie uitgepraat kan raak oor Namibië se edelstene nie, het sy vertel.“Namibië is veilig en baie skoon, en die mense baie vriendelik en verwelkomend,” sê Arbay.'UITSTEKENDE KULTUURTOERISME'“Die land bied uitstekende avontuur- en kultuurtoerisme en is enige fotografie-entoesias se droom.”“Die Indonesiese hoofstad Djakarta alleen het 26 miljoen inwoners en Indonesië het 'n bevolking van 250 miljoen. Indonesiërs is op soek na ander reisbestemmings as Europa, en Namibië is nou 'n gerekende toerismebestemming in die wêreld – veral op die gebied van eko-, avontuur- en kultuurtoerisme.” Me. Asti Upiastirin, wat by die Indonesiese ambassade in Namibië in beheer van inligting, maatskaplike en kulturele sake is, sê sedert Namibiërs en Indonesiërs sonder 'n visum tussen die twee lande kan reis, “het ons 'n neiging gesien dat meer Indonesiërs na Namibië reis en andersom”.Sy sê samewerking tussen hierdie toeroperateur en ander Namibiese operateurs sal deure vir beide Namibiese en Indonesiese toeriste na die twee lande oopmaak. Namibiese toeriste kan die duisende eilande met eksotiese strande, vulkane, asemrowende natuurskoon en ryk wildlewe, soos onder meer komododrake, en interessante Indonesiese kulture ontdek. Vir meer inligting, besoek www.indonesiatripadvisors.com.

Indonesiese toeriste ontdek Namibië

Kommentaar

Republikein 2025-12-16

Meld asseblief aan om kommentaar te lewer

Indonesiese toeriste ontdek Namibië

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.