Indië voer minder goud in

Indië se veldtog teen geld in die sluikhandel plaas 'n demper op die hoeveelheid goud wat dié land invoer.

Indië is ná China die grootste gebruiker van goud ter wêreld, veral vir juweliersware.

Volgens 'n bron het invoer in Januarie tot 58,6 ton, oftewel 28% laer as 'n jaar vantevore, gedaal.

Invoer het reeds met 41% tot 499,1 ton gedurende die eerste tien maande van die huidige boekjaar gedaal.

Na verwagting gaan die vraag na goud in dié land swak bly. Dit was in 2016 die swakste in sewe jaar weens hoër pryse, 'n staking deur juweliers en die regering se verbod op sekere hoërwaarde-geldnote in November.

Volgens die Wêreldgoudraad gaan plaaslike verkope in Indië vanjaar tussen 650 ton en 750 ton wees.

“Vraag gaan steeds laag bly, selfs met likiditeit wat verbeter,” sê Ketan Shroff, sekretaris by die Indiese goud- en juweliersvereniging in Moembai.

“Kopers ruil hul ou juweliersware vir nuwes en die aanbod bly goed.”

Verkope kan effens styg van Maart voor die begin van die Indiese trouseisoen in Maart en April. Shroff sê egter pryse sal moet daal voordat dit regtig weer sal verbeter.

Indiërs koop goud tydens feeste en vir troues as deel van 'n bruid se bruidskat of as geskenke.­ Indië voer bykans alle goud in wat hulle gebruik.

Bloomberg het voorheen berig dat die geldbeleid ook 'n negatiewe uitwerking op die land se diamantmark het.

Indië se besluit om 'n verreikende hervorming van sy geldeenheid vanaf November in werking te stel het tot 'n tekort aan kontant in die land gelei.

Tot 90% van die wêreld se ongeslypte diamante gaan na Indië om geslyp, gepoleer en aan duisende­ maatskappye verkoop te word.

Handelaars gebruik gewoonlik kontant om goud en diamante te koop.

Data van die raad vir die bevordering van die uitvoer van edelstene en juweliersware toon dat Indië se invoer van ongeslypte diamante met 4,7% tot US$1,4 miljard in Desember teenoor 'n jaar vantevore gedaal het. 

– Netwerk24/Bloomberg