Imalwa moet besluit oor Wesbank-bedrogsaak

Jessica Botes - Die aanklaer-generaal, me. Martha Imalwa, moet besluit hoe die bedrogsaak teen drie voormalige werknemers van Wesbank Transport voortgesit gaan word. Mnre. Gavilan Theodore Klazen, Carl David Marx en me. Veronica Leonette Klazen se saak is Vrydag in die streekhof op Swakopmund tot 25 November uitgestel. Dit volg nadat staaksaanklaer Hezekiel Iipinge vir landdros Gaynor Poulton gesê het die beskuldigdes se polisiedossier is vir ’n besluit na Imalwa gestuur. Die staat beweer die drie beskuldigdes het tussen 2008 en September 2011 bedrog ten bedrae van byna N$6 miljoen gepleeg. Volgens ’n mediaverklaring wat op 9 Junie deur die Teenkorrupsie Kommissie (ACC) uitgereik is, is ’n ondersoek in Oktober 2011 ingestel oor die beweerde bedrog en korrupsie wat by Wesbank Transport gepleeg is.Die beskuldigdes het glo hul toesighouers doelbewus mislei en wanvoorstellings gemaak deur die maatskappy se rekenaargebaseerde hulpbronbestuurstelsel en die stelsel vir voertuigskeduleringsverslae te manipuleer. Gavilan en Marx het glo vir vragmotorbestuurders van die maatskappy opdragte gegee om aflewerings te doen sonder om vragbriewe van Wesbank Transport daarvoor uit te reik. Hulle het na bewering ook vir die vragmotorbestuurders opdragte gegee om aflewerings vir derde partye te doen sonder om die regte prosedures te volg. Die staat beweer voorts dat die beskuldigdes skedules op só ’n wyse gemanipuleer het dat aflewerings wat gedoen is, glad nie daarop aangedui is nie. Hulle het ook glo vragbriewe uitgereik en toegemaak sodat dit blyk of geen werk gedoen is nie. Die beskuldigdes het na bewering ook doelbewus nie inligting oor aflewerings wat gedoen is op die maatskappy se elektroniese stelsels aangedui nie. Hulle staan tereg op altesaam 444 klagte van onder meer bedrog, die vervalsing van dokumente en geldwassery saamgelees met die wet op die voorkoming van georganiseerde misdaad (POCA). Gedurende hul vorige verskyning in die streekshof tussen 6 en 8 Junie, is Gavilan, wat die bedryfsbestuurder van Wesbank Transport was, op N$50 000 borgtog vrygelaat terwyl borgtog van N$30 000 aan sy vrou, Veronica, toegestaan is . Marx is ook N$30 000 borgtog toegestaan en al drie beskuldigdes is gelas om hul reisdokumente aan die ondersoekbeampte te oorhandig en om nie gedurende die verhoor die land te verlaat nie. ’n Vierde beskuldigde, wyle mnr. Mark van Wyk, sou glo ook in verband met die saak in hegtenis geneem word. Van Wyk en Veronica se betrokkenheid by die saak hou glo verband met geld wat in hul bankrekeninge inbetaal is.

Imalwa moet besluit oor Wesbank-bedrogsaak

Kommentaar

Republikein 2026-05-05

Meld asseblief aan om kommentaar te lewer

Imalwa moet besluit oor Wesbank-bedrogsaak

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.