Husab gereed vir verwerking

Jessica Botes – Swakop Uranium se Husab-uraanmyn, die grootste oopgroefmyn ter wêreld, sal binnekort met sy verwerkingsaktiwiteite kan begin. Mynboubedrywighede het reeds in Maart 2014 op die myn begin en tot dusver is miljoene tonne klip ontgin. Volgens die uitvoerende hoof van Swakop Uranium, mnr. Zheng KePing, bevat elke ton klip 140 kg erts wat ná verwerking 70 g uraan lewer. Die myngat is drie km wyd, 1,5 km lank en 400 meter diep en volgens Zheng beoog die maatskappy om die derde grootste produsent van uraankonsentraat in die wêreld te word. Volgens Zheng is meer as US$2 miljard aan die bou van die Husab-myn bestee. Die myn betaal jaarliks tussen N$1,1 miljard en N$1,7 miljard maatskappybelasting en N$220 miljoen se tantieme. Die myn dra ook jaarliks N$7,3 miljard tot Namibiese uitvoere by. “Husab sal elke jaar 11% van die totale gewig van goedere benodig wat in 2015 by die hawe op Walvisbaai afgelewer is. Voorts sal die myn 50 miljoen liter diesel elke jaar vir sy mynaktiwiteite nodig hê,” het Zheng gesê.Na verwagting sal die myn sowat 1 600 permanente werkgeleenthede te skep, met 'n bykomende 4 500 tydelike werkgeleenthede in die myn se ontginnings- en verwerkingsaktiwiteite. Tans is 92% van die myn se personeel Namibiërs, maar dit sal volgens Zheng na 95% verhoog word. Volgens hom is meer as die helfte van die personeel jeugdiges en meer as 10% is vroue. Die Husab-gebied was in 2006 oorspronklik vir eksplorasie geteiken, gegrond op die geologies gegronde argument dat die betrokke rotsformasies soortgelyk aan Rio Tinto se Rössingmyn noord van Husab sou wees.Die toetsgate is in 2007 geboor, waarna die positiewe resultate van die wetenskaplike toetste in Februarie 2008 bekend gemaak is.? Skenking van N$200 000 vir Namibië se droogtehulpfonds is Vrydag deur Swakop Uranium aan die eerste minister, me. Saara Kuugongelwa-Amadhila, oorhandig. Volgens haar moet die regering nog N$242 miljoen vir droogtehulp bymekaarmaak. “Hierdie skenking sal beslis duisende Namibiërs help wat deur die droogte benadeel word. Tot dusver is 83 000 ton mieliemeel aan die meer as 600 000 Namibiërs gegee wat hulp nodig het. Ons sit egter in ? noodsituasie omdat Namibië sal sukkel om kos in te voer van sy buurlande wat ook deur droogte beïnvloed word,” het Kuugongelwa-Amadhila gesê.

Husab gereed vir verwerking

Kommentaar

Republikein 2025-08-01

Meld asseblief aan om kommentaar te lewer

Husab gereed vir verwerking

Kommentaar

Republikein 2025-08-01

Meld asseblief aan om kommentaar te lewer

MELD AAN

Advertensie