Huldeblyk aan kameraad Katamelo

PECKA SEMBA SKRYF:Dis met ongeloof en skok dat ek die nuus oor die heengaan van kameraad Atanasius (Kata) Katamelo op Vrydag 14 Mei 2021 ontvang het.In plat taal kan dit vergelyk word met ’n emmer vol yskoue water wat oor my gestort is. Vir ’n verganklike mens soos ek, is dit verskriklik moeilik, indien nie onmoontlik nie, om die skielike heengaan van hierdie strydos te verwerk en te verstaan.Om sy lewensgrote beeld en dade in perspektief te plaas, benodig seker ’n ensiklopedie, omdat dit wat hy vermag het nie in hierdie kort samevatting beskryf kan word nie.Kameraad Katamelo was ’n ware steunpilaar vir die Tsjaka-omgewing en Omaheke-streek. Hy was iemand wat nooit teruggestaan het vir enige uitdaging nie. Die vooruitgang en welvaart van sy gemeenskap is iets wat altyd eerste in sy bewussyn was. Niks was te moeilik en geen taak was bo sy vuurmaakplek nie.Hy het hierdie buitengewone gawe gehad om baie kalm en bedaard voor te kom ten midde van ’n woedende storm, maar in dieselfde asem kon hy doeltreffend en met gesag menige uitdagings suksesvol voltooi. Dis ’n gawe wat jy nie sommer om elke bos en struik kan uitgrawe nie!Kameraad Katamelo was ’n ware “introvert”, wat jy selde uitbundig hoor praat het. Sy waarde was stewig geanker in praktyk en die resultate van sy vele werke sal as getuienis vir nageslagte dien. Hy was ’n beginselvaste mens wat geglo het ’n dag is nooit daar om gemors te word nie, maar dat jy ’n taak so vinnig as moontlik moet voltooi, sodat jy na ’n ander kan aanskuif.Swapo in Omaheke en Namibië as geheel is heelwat armer met sy heengaan. In sy tyd as Swapo-koördineerder van die Kalahari-kiesafdeling het die party keer op keer gemaklik aan die wenkant geëindig in menige verkiesings.Sy doeltreffende organisasievermoë het hom een van die mees gesogte persone gemaak om ’n taak aan te pak en tot sy logiese einde te bring.Sy geloof en standvastigheid in dit waarin hy geglo het, is legendaries. Jy het altyd geweet waar staan jy met hom. Hy was altyd ’n eerlike en hardwerkende opponent, wat altyd die bal gespeel het en nie die mens nie.Seker een van sy mees geliefde stokperdjies was perde. Hy was ’n perdeliefhebber van formaat en deur sy insette het hy perdesport van ’n nederige tydverdryf help bring tot waar dit vandag vir geen sport hoef terug te staan nie. Ek is seker die troon waarop perdesport nou sit, is hoog en gemaklik omdat dit gedeeltelik op die breë en onselfsugtige skouers van hierdie reus van ’n mens gestaan het.Tipies van die man, het hy nooit hierdie groot lof vir homself toegeëien nie. Hy het selde oor sy suksesse gepraat.Katamelo het nooit weggeskraam van enige kompetisie nie en hy was altyd voorbereid om sy geliefde perde te laat hardloop in vele kompetisies. Wie sal ooit vir Swaairokkie vergeet, en die ander perde uit sy stal wat wêreld warm gehardloop het?Die minste wat die perdewedrenfederasie in sy eer kan doen, is om die resiesbaan te Tsjaka die Katamelo Turf Klub of soiets te noem. Daardeur kan sy naam vir ewig lewendig bly, en dit sal dien as ’n herinnering aan sy onbaatsugtige bydrae tot hierdie wonderlike sport.Ten spyte van al hierdie wonderlike karaktereienskappe, was Katamelo maar net ’n gewone mens vir wie die welvaart van die volgende persoon verskriklik saak gemaak het, veral in en rondom Tsjaka. Hy was tuis tussen die massas; die vergete en neergedrukte burgers. In hom het hulle ’n skouer gehad waarop hulle enige tyd van die dag en nag kon huil.Vele kere kon jy sien dat die meeste van hulle vertroosting en baat by hom gevind het. Volgens my is dit ’n erfenis wat moeilik nagedoen sal word.Ook was Kameraad Katamelo ’n pligsgetroue familieman, wat vir baie jare getroud was met mevrou Christa Katamelo, ’n persoon vir wie ek goed ken omdat sy ’n departementshoof en waarnemende skoolhoof by Mpe Thuto Primêre Skool op Tsjaka is. My medelye en morele onderskraging gaan ook uit na haar vir hierdie harde slag wat sy toegedien is.Vaarwel en mooi loop. Dankie vir die mooi herhinneringe.

Huldeblyk aan kameraad Katamelo

Kommentaar

Republikein 2025-12-19

Meld asseblief aan om kommentaar te lewer

Huldeblyk aan kameraad Katamelo

Kommentaar

Republikein 2025-12-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.