Huldeblyk aan Ignatius Shixwameni

OOM BOY STRAUSS, APP-STIGTERSLID EN DIE KHOMASDAL AKSIE GROEP SKRYF: Altyd voorwaarts! Dit was die strydkreet tydens sy studentejare, dog meer besadig in die latere jare as politieke leier. As ’n stigterslid van die APP het ek en Iggy, soos hy alom bekend was, baie nou saamgewerk.

Jy moes hom intiem ken om die diepte van sy gees te kon bepaal. In baie gesprekke het ons oor ons land, sy mense en uitdagings gesels, verskil en tog weer mekaar gevind en die toekoms positief ingegaan. Hy was net so!

Verlede Woensdag het die Namibiese parlement ’n intellektuele reus armer geword, maar die hemele het ’n merkwaardige gees ryker geword.

Iggy kon die moeilikste situasie met sy aansteeklike laggie ontlont. Die naaste parlementslid wat hom dit kon nadoen, is die baie bekwane Elma Dienda wie ook moeilike dinge aanpak met ’n glimlag.

Aan sy eggenote en dogters, wees verseker die Kavango en in besonder Namibiese gemeenskappe treur saam met julle. God maak wees, maar Hy laat nie wees nie. Hy sal op Sy wonderbaarlike manier Iggy se plek in jul harte vul.

Mag sy nagedagtenis bly voortleef in ons harte.