Huis Acacia brei uit

Die Kankervereniging van Namibië sal binnekort meer pasiënte by Huis Acacia, ’n tussentydse tuiste in Windhoek, kan huisves danksy die stewige skenking van drie Namibiese maatskappye. Die Kankervereniging se langtermynvennote, Namibia Breweries Limited (NBL), die FNB Namibia-stigting en die Namsov-gemeenskapstrust, het verlede week ’n skenking van N$470 000 gemaak, onder meer vir die finansiering van ’n nuwe pasiëntesorgafdeling. Verteenwoordigers van die drie maatskapye het die Kankervereniging lof toegeswaai vir die ongelooflike ondersteuning wat dit die afgelope 30 jaar aan kankerpasiënte bied. “Kanker het ’n invloed op elkeen van ons, of jy nou ’n familielid, ’n vriend, ’n medewerker, ’n dokter of ’n pasiënt is,” het me. Anne-Marie Molatudi van Namsov gesê. “Oor die afgelope paar jaar het ons sowat N$120 000 jaarliks geskenk, maar vanjaar het ons ons skenking tot N$250 000 vir die ondersteuning van Huis Acacia verhoog. “Die verhoging is gemotiveer deur die uitbreiding wat Huis Acacia onderneem.”Die oorhandiging is gevolg deur ’n sooispitseremonie vir die nuwe uitbreiding ten bedrae van N$1,7 miljoen wat meer akkommodasie aan kankerpasiënte sal bied. “Tans het ons 21 beddens wat kankerpasiënte van oral in Namibië kan akkommodeer, maar ons waglys is baie lank, daarom is hierdie uitbreiding uiters nodig. Te danke aan die ondersteuning van die publiek en ons vennote kan ons nie net die uitbreiding van stapel stuur nie, maar ook die nodige herstelwerk aan ons huidige geriewe doen,” het mnr. Rolf Hansen van die Kankervereniging gesê. “Sedert die die opening van die Namibiese Onkologiesentrum het ons ’n drastiese verhoging in die akkommodasiebehoeftes vanaf Januarie gesien, aangesien daar nou ’n groter verskeidenheid van behandelingsopsies plaaslik beskikbaar is. “Baie Namibiërs moes in die verlede na Suid-Afrika reis vir gespesialiseerde kankerbehandeling,” het Hansen bygevoeg. “Namibia Breweries bly verbind daartoe om verdere hulp aan die Kankervereniging, sy personeel en vrywilligers te verleen om Huis Acacia ’n tuiste weg van die huis vir kankerpasiënte te maak,” sê mnr. Abrie du Plooy van NBL se skenking van N$120 000 vir die uitbreiding en herstelwerk. “Kanker is ’n siekte wat alle Namibiërs beïnvloed en dit behoort ’n prioriteit vir alle aandeelhouers te wees om betrokke te raak by programme wat dit beheer,” sê mnr. Bolle Hans van die FNB Namibia---stigting, wat N$100 000 geskenk het. Aangesien Huis Acacia ’n liefdadigheidsorganisasie is wat geen geldelike bystand van die regering ontvang nie, maak elke skenking saak. “Elke skenking is ’n druppel wat die emmer ’n bietjie voller maak,” sê Hansen.

Huis Acacia brei uit

Kommentaar

Republikein 2025-06-09

Meld asseblief aan om kommentaar te lewer

Huis Acacia brei uit

Kommentaar

Republikein 2025-06-09

Meld asseblief aan om kommentaar te lewer

MELD AAN

Advertensie