Hout in Ohangwena gekonfiskeer

Die hoof van die ministerie van landbou, water en bosbou se direktoraat van bosbou in die Ohangwenastreek, mnr. Moses Moses het gesê sy afdeling is vasbeslote om die strydbyl op te neem teen die smokkelary van hout wat onwettig afgekap is.
In ’n telefoniese onderhoud met Nampa, het Moses gesê bosbou-beamptes is op die uitkyk vir oortreders wat Ohangwena as ’n transito-punt vir hout gebruik wat onwettig in die Kavango-Wesstreek afgekap word. Dit kom ná daar in September en ook vroeër hierdie maand op vragmotors beslag gelê is wat propvol hout was wat in die Kavango-Wesstreek afgekap is.
In die jongste voorval is beslag gelê op ’n vragmotor en sleepwa naby Eenhana wat met 100 pale, 100 heiningpale en twee ton vuurmaakhout gelaai was.
“Daar is op die vragmotor beslag gelê, die bestuurder is met N$800 beboet en al die produkte wat die permit oorskry het, is op Eenhana afgelaai,” het Moses gesê.
Die vragmotor was vanaf die Kavango-Wesstreek na Oshakati in die Oshanastreek op pad. Die vragmotor behoort aan ’n bekende sakepersoonlikheid op Eenhana, maar is deur vier individue van Kavango-Wes wat gewoonlik hout verkoop, gehuur om die hout te vervoer. Die hout was bestem vir kliënte in die Ohangwena-, Oshana-, Omusati- en Oshikotostreek.
Moses het gesê die vier individue het ’n permit gehad om 100 pale te vervoer, maar sowat 2500 stukke hout is op die vragmotor gevind. Die vragmotor aan die eienaar besorg ná beamptes van die direktoraat van bosbou die hout afgelaai het.
Beamptes van die direktoraat het verlede maand beslag gelê op ’n vragmotor met 2 000 stukke hout wat onwettig by die
Mukekete-nedersetting (ook in Kavango-Wes) afgekap is. Die hout is gekonfiskeer en die bestuurder is met N$300 beboet. – Nampa