Hou verby ouetehuis, hallo passasierskip

Ouetehuise met hul pragtige name soos Huis Herfsblaar, Najaarsrus of Silwer Hare, is peperduur!N$7 062. Dit is wat my pa se maandelikse verblyf in 'n ouetehuis kos. Absoluut skandalig. Dit is nie vir 'n woonstel nie, maar vir 'n enkelbed in 'n kamer. Dit sluit darem ook drie onsmaaklike ete's per dag in. Jou aandete bestaan uit twee snye brood met rooibekruip. Net koshuisbrakke sal weet wat rooibekruip is. Dit is daai rooi, gemengde vrugtekonfyt wat jy op bruinbrood in die koshuis gekry het.Ek het my ma belowe ek sal haar nooit in 'n ouetehuis sit nie en sy bly by my. Wat van my op my oudag gaan word, is 'n raaisel, want ek het geen kind of kraai om na my te kyk nie. Ek sien ook nie kans vir 'n ouetehuis nie. Koek en tee, skinder en klets oor die oulikste kleinkinders is nou nie my idee van pret op my oudag nie. Toe lees ek in die reistydskrif Conde Nast Traveler van die 65-jarige Amerikaner Mario Salcedo wat al vir 20 jaar op 'n passasierskip bly. Hy het op die ouderdom van 45 besluit om 'n nuwe hoofstuk in sy lewe te begin en rondom die wêreld te reis. Hy het nie so mooi van die logistiek geweet nie - of hy per lug, trein of see moet reis nie. Toe bespreek hy vir hom 'n bootreis op die Voyager of the Seas, toe die grootste passasierskip ter wêreld. Voor oom Mario sy oë kon uitvee, het hy 6 000 nagte op luukse passasierskepe geslaap en het hy 850 skeepvaarte agter die blad. "Ek word soos 'n koning behandel," vertel hy. Hy is ook 'n naguil: "Ek gaan dans of geniet 'n sigaar met konjak na aandete in een van die sitkamers. Alles wat ek op die skip doen, gee my 'n geleentheid om nuwe vriende te maak." Oom Mario sê hy bestee net sowat 15 dae op vaste grond en dit is net as hy vir sy jaarlikse doktersbesoeke moet gaan.Die geheim is dat hy soveel goedkoper op die passasierskip bly omdat hy 'n lojale kliënt is en groot afslag kry. Ek het ook gelees van 'n Britse tannie wat al jare op 'n passasierskip bly, want sy meen dit is goedkoper as 'n ouetehuis in Londen. Boonop is alles tot jou beskikking: Baie lekker kos, tonne vermaak, 'n biblioteek, 'n gimnasium en 'n dokter by die kliniek. Die beste van alles is dat jy die wêreld kan sien! Nie te sleg vir 'n aftrede nie. In elk geval baie beter as op 'n stoep by 'n ouetehuis.Ek sien al hoe sit ek en my ander reisverslaafde vriende op 'n passasierskip, elkeen met 'n lang skemerkelkie in die hand en tuur oor 'n vreemde watermassa soos die Karibiese See. Ons bewonder die asemrowende sonsondergang op die horison en ons sal gesels oor die wonderlike plekke waar ons al in die wêreld was. "Hoe sê, Kwagga?"

Hou verby ouetehuis, hallo passasierskip

Kommentaar

Republikein 2025-09-19

Meld asseblief aan om kommentaar te lewer

Hou verby ouetehuis, hallo passasierskip

Kommentaar

Republikein 2025-09-19

Meld asseblief aan om kommentaar te lewer

MELD AAN

Advertensie